Kum 2023-2024 chhungin Serchhip District-ah naupang kum 5 hnuailam kawthalo vanga thi an awm lo

Nimin khan Serchhip-ah District Level Steering Committee on Stop Diarrhoea Campaign chu thukhawmin naupang kum 5 hnuailam zingah kawthalo natna avanga thihna umbo a nih theih nana hmalak dan tur an sawiho a, kum 2023-2024 chhungin Serchhip District-ah naupang kum 5 hnuailam kawthalo vanga thi an awm lo tih tarlan a ni.

Serchhip DC Meeting Hall-a District Level Steering Committee on Stop Diarrhoea Campaign thutkhawm hi Serchhip District Bawrhsap Paul L. Khuma hova neih niin Bawrhsap chuan Serchhip District chhungah kum 2023-2024 chhungin naupang kum 5 hnuailam kawthalo vanga thi an awm lo chu lawmawm a tih thu sawiin, hun lo la kal zel turah pawh kawthalo natna avanga naupang thi an awm lohna turin tan lak zel a tul thu a sawi a. Inven theih leh enkawl dam theih natna avanga nunna chan an awm loh na tura tanlak a pawimawhzia pawh sawiin, kawthalo laka naupang an him theihna tura hmalakna te puanzar tam a tul thu leh a inenkawl dan leh inven dan inzirtir tam a tulzia a sawi a. Member kalkhawmte chu an tihtur an kova tla te tha taka hlenchhuak a, ruahmanna fel fai tak siam turin a chah a ni.

STOP Diarrhoea Campaign hi Sawrkar Laipui ruahmanna niin thla hnih chhung - July leh August thla chhunga neih tur a ni a. Serchhip District ah pawh a hawnna programme hi July ni 1 khan neih a ni tawh a. Kum dangah he Campaign hian kar hnih chauh a awh thin laiin kumin atang hian thla hnih (2) a awh tawh dawn a, Health & Family Welfare Department kaihhruaiin Department hrang hrang PHE, UD&PA, Social Welfare, DRDO, I&PR, Education Department leh Rural Development Department te nen tanghoin kawthalo umbo beihpui thlak a ni dawn a ni.

Stop Diarrhoea Campaign-in a tum ber chu India ram pumah naupang kum 5 hnuailam kawthalo vanga thi an awm tawh lohna tura beihpui-thlak a ni a. Mizoram-ah hian kum 2023-2024 chhung khan naupang kum 5 hnuailam katthalo vanga thi pakhat (1) a awm thu Meeting-ah hian tarlan a ni a. Serchhip District-ah erawh chuan naupang kum 5 hnuailam kawthalo vanga thi an awm lo a ni. He campaign hun chhung hian naupang kum 5 hnuailam te chu ORS leh Zinc pek vek an ni dawn a, Serchhip District-ah hian naupang 5297 hnenah ASHA ten In tin tlawhin damdawi te hi an pe dawn a ni. Nimin-a thutkhawm ah hian Line Department te chu an hmalak dan tur duang tur leh chumi anga hma la tura tih an ni.