Mizoram-ah kumin hian Malaria hluarin Thla 5 chhungin hri kai 7068 hmuh an ni tawh

Kumin 2024 hian Mizoram-ah Malaria hri kai an pung chho nasa hle a. Health Department chhinchhiah danin kumin January atanga May thla tawp thleng, thla 5 chhunga Mizoram-a Malaria hri kai hmuhchhuah zat chu 7068 an tling tawh a ni.

Zawhna chhangin Health Department-a thawktute chuan Malaria chu Mizoram khawthlang lamah a hluar zual niin an sawi a. A bikin Lawngtlai, Lunglei leh Mamit District-ah te Malaria vei hmuhchhuah an tam zual a. Lawngtlai District-ah hmuhchhuah tam berin thla 5 kalta (January to May) chhunga Malaria vei hmuhchhuah zat chu 3393 an ni a, hei hi kumin-a Mizoram-a Malaria hmuhchhuah zawng zawng 7068 atanga chhutin 48% a tling phak a ni.

Lunglei District chu Malaria hri kai hmuhchhuah tam ber pahnihna District niin mi 1691 in an vei tih tih hmuhchhuah a ni a, Mamit District chuan dawt lehin kumin chhungin Malaria vei mi 1390 hmuhchhuah a ni a. District danga Malaria hmuhchhuah dan chu Siaha District-ah 551, Aizawl East District-ah 13, Aizawl West District-ah 11, Serchhip District-ah 9 leh Kolasib leh Champhai District-ah 5 ve ve te an ni. Malaria vei hmuhchhuah zinga 3645 hi PF an ni a, PV 3423 awm bawkin Mmalaria vanga thi erawh kumin hian an la awm lo thung.

Health Department thawktute chuan Mizoram boruak chu Malaria inthlahpunna atana hmun duhthusam anih avangin a pung niin an sawi a, “Ruahtui a tla tha a, a tawk chauhin khua a lum bawk a. Malaria pai Thosi inthlahpunna tur tui thianglim tling a tam bawk nen kum 2020 atang khan kumtin mai hri kai hi kan pung chho ta zel a ni,” an ti a. Malaria chu a bik takin Chakma hnam zingah a hluar nia sawiin, “Thosi len zar lovin ramah te an riak a, Malaria an rawn vei haw a. Mahse Covid ang deuh khan engmah an taksa-ah a langchhuak (symptoms) a awm bawk si lo a. Heng mite hian an pu darh thin niin kan hria a ni,” a ti. Health Department-a thawktute chuan kumthar lamah chuan Malaria hi a ziaawm an beisei tih sawiin, “Thosi tihremna atana damdawi kan hman thin DDT kha a thawk tha tawk lo nia kan hriat vangin Delta Mathrin hmangin kan kap a. Thosilen pawh engemaw zat kan sem bawk,” tiin nakum lama a ziaawm an beisei thu an sawi a ni.