Central University tha thlanna ah MZU 15-na

Indian Institutional Ranking Framework (IIRF) in ramchhunga Central University tha zual a thlan zingah Mizoram University (MZU) chu 15-na a ni.

IIRF-in kumtina India rama University tha zual a thlan thin ah kum 2024 hian Central University zingah Jawahar Nehru University (JNU), New Delhi chu pakhatna a ni a, University of Delhi (DU), New Delhi chu pahnihna niin Banaras Hindu University (BHU), Varanasi chu pathumna a ni a. Mizoram University (MZU) chu 15-na niin India Hmarchhak State-a Central University zingah a titha ber dawttu a ni pha a, hmarchhak State zingah Rajiv Gandhi University, Arunachal Pradesh chu titha berin 13-na a ni thung a, Mizoram University leh Tezpur University, Assam ten an dawt a ni.

Hmarchhak State dang atangin North Eastern Hill University (NEHU), Meghalaya chu 18-na niin Sikkim University chu 23-na a ni a, Assam University chuan 24-na niin Manipur atangin Central Agriculture University chu 31 a ni a, Manipur University chu 35-na a ni thung a, Tripura University chu 47 na a ni bawk.

Nikum lama IIRF University Ranking-a Central University tha zual 20 thlanchhuah zingah Mizoram University chuan 13-na a lo luah phak tawh bawk a ni. IIRF Ranking 2024-ah hian sawrkar leh Private enkawl, Deemed University zingah Indian Institute of Science (IISc), Bengaluru chu pakhatna a ni a, Private University zingah Ashoka University, Sonipat chu pakhatna a ni bawk.