Mi taima leh thahnemngai te tan sawrkarin Ban-a kaih ‘Hand Holding Policy’ a siam - Minister, EF&CC

Environment Forest & Climate Change Department changtu Minister Lalthansanga chuan mi taima leh thahnemngai te tan sawrkarin Ban-a kaih ‘Hand Holding Policy’ a siam thu a sawi.
MZP Hqrs. Serchhip ten kumin a HSLC leh HSSLC Exam Result chhuaka zirlai tithate chawimawina hun nimin-a Serchhip Auditorium-a an buatsaih a hmanpuina ah EF&CC Department changtu Minister Lalthansanga chuan Kalphung thar sawrkarah mi tin tan hmun a awm thu sawiin, mi taima leh thahnemngai te tan sawrkarin Ban-a kaih ‘Hand Holding Policy’ a siam thu a sawi a. Thalai lehkhathiamte zingah sawrkar hnaa innghat lova, mahni ke-a din tumten harsatna an tawh dan an zirchian thu leh chuta an hmuhchhuah chu sum leh pai bultanna tur Financial Support-ah harsatna lian tak an nei tih an hriat thu a sawi a. “Heng mite tan hian sawrkar chuan kawngkhar zau takin a hawng ta a, an thiamna hmangin Zoram a kang dawn a ni,” a ti. EF&CC Minister chuan Sawrkar in kal tumdan a neih chu - ‘Zoram rorelna In sang berah Pathian lalram lo thleng rawh se,’ tih a ni tih pawh sawiin, a hlawhtlin theih nan tan an lak mek thu leh Jail pawh misual tanna hmun ni loin mi fel siamna hmunah siam an tum thu a sawi bawk a ni.

EF&CC Minister chuan Serchhip atanga HSLC, HSSLC leh Mizoram University Exam-a hlawtlingte a lawmpui thu pawh sawiin, Zirlaite, Zirtirtute leh nu leh pate thawhrimna rah a nih thu a sawi a. Zirlai kalkhawm te fuihin an nunah hlawhtlinna chauh ni lo, chona leh hlawhchhamna an hmachhawn hun a awm ngei ngei dawn a, hlawhchhamna hi hlawhtlinna kalkawng a ni tih hria a beidawng lo turin a fuih a. Zirnaah tan la a, Hindi thiam kawngah pawh hmasawn tum tura fuihin, “Hindi thiam hi vai-na a ni loa, kan ram tan Hindi kan thiam a ngai a ni,” a ti bawk.

MZP Hqrs. Serchhip ten zirlai tithate chawimawina hun an buatsaih ah hian zirlai mi 45 te hnenah chawimawina hlan an ni a, Mizoram University Examination, 2024-a Govt. Serchhip College atanga Department of Chemistry-a Mizoram pum-a palina (4th rank) hauhtu K. Lalrindiki, leh pakuana (9th rank) Lalrampari te bakah HSLC Exam-a Mizoram-a pasarihna dinhmun luahtu Goodwill English Academy zirlai Zomuansanga te leh Distinction a pass chhuak te hnenah chawimawina hi hlan an ni. Hei bakah hian result chhuak taa zirlai 100% pass nei thei School Marian High School hnenah lawmpuina hlan a ni bawk.