Serchhip District-ah ASF vangin Vawk 921 thi tawh
AH&Vety Department chhin-chhiah danin nimin khan Serchhip District-a khaw 7-ah Vawk thi 39 awm lehin heng zinga 29 te chu Thenzawl-a mi a ni a, North Vanlaiphai-ah 3 thiin Chhiahtlang leh East Lungdar-ah pahnih ve ve a thih bakah Baktawng, New Serchhip South leh Serchhip Dinthar-ah pakhat theuh an thi a, Ser-chhip Dinthar Veng-a Vawk thi hi an Veng-a Vawk thi chhinchhiah hmasak ber a ni. Nimin vek khan Serchhip District-a khaw 11-ah Vawk 129 suat leh a ni bawk a, Serchhip Chanamri-ah Vawk 38 zet suat niin North Vanlaiphai-ah 27 leh Kei-tum-ah 22 te chu Vawk suat tam zualna a ni.
Heti hian nimin thleng khan Serchhip District-a khua leh Veng 23-ah ASF vangin Vawk 921 thi tawhin Vawk 2581 suat a ni tawh bawk a, ASF vanga Vawk thi tamna ber Thenzawl-ah Vawk 290 thi tawhin North Vanlaiphai-ah Vawk 179 a thi tawh bawk a. Vawk suat tamna ber Chhingchhip-ah 1238 suat ni tawh bawkin North Vanlaiphai-ah Vawk 282 suat a ni tawh bawk.
Kumin hian Mizoram-a khua leh Veng 155-ah ASF hri hi leng tawhin nimin thleng khan Vawk 4813 a thi tawh a, Vawk 9079 suat a ni tawh bawk a. Nimin bikah Vawk 220 thiin Vawk 477 suat a ni bawk.
Comments
Post a Comment