Lungawi lohna thu sawi

NGO pakua telna Joint NGO Chawngte chuan Mizoram Sawrkar a Minister pathum te hnena an mamawh zual tak tak chauh ngaih pawimawh sak tura an ngenna in awmzia a nei loh avangin an lungawilo hle tih an sawi.

Nimin-a thuthar thehdarhtute an kawmna ah May ni 8 leh 9 khan Aizawl-ah kalin Joint NGO hruaituten PWD, Health leh Home Minister te hmuin mamawh tam tak an neih zingah an mamawh zual tak tak chauh ngaih pawimawh sak tura an ngenna chuan tun thlengin ngaihsak a hlawhlo chu hriatthiam har an tih thu an sawi a, inngaihsak lohna leh inthliarna ang hiala an ngaihthu sawiin, an ngenna chungchang ah August 13 thleng sawrkar ngaihchan an tum thu leh hemi hnu ah a tul chuan na zawka Sawrkar nawr an tum thu an sawi a ni.

Joint NGO hruaitute chuan Chawngte khawchhung bikah ringawt pawh mihring 13,448 awmin, Police indaihlohna a lian hle niin an sawi a, tun dinhmunah Chawngte Police Station-ah awm thei tur a tih mi 24 ah mi 6 chauh an awm a, Constable phei chu pakhat chiah a awm niin an sawi a. Community Health Centre hnuaiah mihring 24,939 awmin hmanrua chi hrang hrang ah a tlabal in thawktu an indaihloh hle tih an sawi a, thildang engemawzat zingah Doctor pakhat tal dah belh tura an ngenna chuan ngaihven a hlawh lovin, June 6, 2024-a Doctor 35 lak thar zingah Chawngte ah dahtur ruahman a ni ve lo chu hriatthiam har an tih thu an sawi a, CHC Chawngte-ah thawktu awm thei tura ngaih mi 46 a nih laiin tun dinhmun ah mi 22 chauh an awm thu an sawi bawk.

SASCI hnuaiah Chawngte khawchhung kawngpui siamthat tura tih chu hna chu mumal taka thawh a awmlo niin an sawi a, tun thla ni 22 hi he hna zawhfel hun tur a tih anih laiin WBM takngial pawh phah zawh a la ni lova, an phahsa pawh ruahsur vang leh hmanrua thalo hman vangin a chhe deuh vek niin an sawi bawk.