Governor in NHIDCL te kawng dinhmun a sawipui
Mizoram Governor Dr. Hari Babu Kambhampati chuan nimin khan NHIDCL- Regional Office Aizawl hotute Raj Bhavan-ah thutkhawm neihpuiin Mizoram-a kawng siam hna an thawh mek dinhmun a sawipui.
He thutkhawm ah hian NHIDCL ten Mizoram chhunga National Highway siam hna hmun 8-a an neih chungchangte Power Point Presentation hmanga thlirho niin NHIDCL hotute hian Vairengte – Sairang leh hmun danga hna thawh theih a nih loh chhan te an sawifiah a. NHIDCL hotute chuan kawng siam hna hmun thenkhatah mimal hmalakna leh dodalna avanga hna a khaihlak thin thu sawiin, an harsatna lian ber erawh kawng laihna tur ruahman chungchangah sawrkar Department pahnih inremsiam theih loh vang a nih thu an sawi a. Hemi chungchangah hian Governor Dr. Hari Babu Kambhampati chuan NHIDCL hnathawk te chu beidawng mai lovin, Mizoram tana hmasawnna ruhrel pawimawh hmasa bera chhal theih, NH kawngpui laih zau leh siam hna thawh a nih theih nan an harsatna tawh chu chinfel dan zawng chhunzawm zel turin a chah a. Hmalak chhunzawm dan tur pawh sawipui nghalin, amah pawhin Ministry lamah a theih dana umzui a tum thu a sawi a ni.Governor Dr. Hari Babu Kambhampati chuan NH kawngpui te chu Mizoram tana a pawimawh zia mipui nawlpui chuan an hre vek tawh tih sawiin, hetihla hiain NH kawngpui zingah pawh, Mizoram tana ‘Nunna Hnar’ tia chhal theih Vairengte - Sairang kawngpui 4 Lane a siam hna a thawh theih loh tawp chu pawi a tih zia a sawi a. He kawngpui hi a tlang rual rualin Mizoram-ah nitina kan khawsakna atan sum senso nasa takin a tlem phah dawn a, bungraw leiman nasa takin a tlem phah bakah Mizoram-ah hmasawnna kawng hrang hrangin a thlen thei dawn a ni, a ti. Chuvangin, hetiang khawpa kawngpui pawimawh hi a rang lama an thawh theih a pawimawh thu leh Department pahnih te pawhin an inkara chinfel tur awmte chinfel tumin theihtawp an chhuah a ngai tih a sawi a ni.
Tun dinhmunah NHIDCL hian Mizoram-a project 8 a thawh mek zingah Dulte - Champhai (NH-6) chu zawhfel a ni tawh a. Aizawl - Tuipang (NH -54) chu 91% thawh zawh niin kumin December thla hian zawhfel hman beisei a ni a. Seling - Dulte (NH - 6) chu 95% zawh a ni a, Lunglei - Tlabung (NH-302) 43% zawh tawh a ni a, Keifang - Tuivawl (NH -102B) chu 56% zawh niin June 2025-ah zawhfel tum a ni a, Zorinpui - Longmasu (NH-502 A) chu February 2023 khan thawh tura peihfel a ni nain Land acquisition leh Forest Clearance fel lo avangin a la thawh theih loh a, 4 Laning of Vairengte - Sairang (NH-306 & 6) chu kawng laihna tur ram a fel thei lo a, Aizawl By-pass (NH-6) Sairang leh Aizawl inkalpawhna tur pawh kawng laihna tur ram a la fel hlei thei lo a ni.
Comments
Post a Comment