Directorate of Agriculture-ah Marketing Wing changtlung zawk din tura hmalak chhoh mek a ni

Agriculture & Farmers Welfare Department changtu Minister PC. Vanlalruata chuan Sawrkar tharin Agriculture Marketing a ngaihpawimawh em avangin Directorate of Agriculture-ah Marketing Wing changtlung zawk din tura hmalak chhoh mek a nih thu a sawi.

Tuichangral Organic Farmer Producer Company Ltd. te Lakhuithei thar zawrhchhuah runpui 'Pineapple Bonanza 2024' nimin-a Millennium Centre kawt-a neih a hmanpuina ah Agriculture Minister chuan Market tel lo production ringawt hmangin thui tak a kal theih loh avangin Marketing lam leh Farmer-te awmze nei leh mumal zawka thlunzawm tum a nih thu leh a hlawhtlin theih chuan Agriculture-ah hmasawnna inlumlet a awm thei dawn tih a sawi a. Sawrkar tharin Agriculture Marketing a ngaihpawimawh em avangin Directorate of Agriculture-ah Marketing Wing changtlung zawk din tura hmalak chhoh mek a nih thu sawiin, Mizoram Agriculture & Allied Marketing Board kalpui chhoh mek a nih thu pawh a tarlang bawk.

Agriculture Minister chuan Chemical tel lo Organic Lakhuihthei zawrh chhuah runpui, Pineapple Bonanza tum thum lai buatsaih a ni ta chu lawmawm a tih thu sawiin, a hlawhtlin theih nana hmalatute fakawm a tih thu a sawi a. Organic Farming kalpui nan sawrkar laipuiin chak taka hma a lak dante tarlangin, North East State tan kum 2013 atangin MOVCD-NER kalpui a ni a, Mizoram-ah kum 2016 atangin Mission Organic Mizoram kalpui niin, a hlawhtlinna pawh hmuh chhoh mek zel a ni, a ti a. Mission Organic Mizoram kaltlangin tuna hmalak mekna Mizo Hmarchate, Sawhthing, Aieng, Thingpuife leh Lakhuihtheite bakah Mizoram thar Sapthei chu a danglam bik avang leh India ramah ching an tam loh avangin Chief Minsiter duhdanin MOM hnuaia hmalakna turin telh belh tum a ni, a ti bawk.

Mission Organic Mizoram hlawhtlinna hmel hmuh a nih theih nana Agriculture Department hotute leh thawktu dangte bakah FPC enkawltu Clover Organic Pvt. Ltd. leh service provider-te hmalakna chhuanawm a tih thu pawh Minister chuan sawiin, Khawvelin chemical tel lova enkawl thlaite a ngaihhlut thu leh khawvel hmasawn zelah hrisel nan ei leh in duh uluk a tul tih a sawi a, mipuite chu organic thlai te ngaisanga ei tam turin a fuih bakah Mission Organic lama thanharh a ngaih thu sawiin, hei hian market tha zawkah min hruai thleng thei dawn a ni, a ti bawk.