Hydro-Met Data Centre & Water Quality Laboratory hawng

Irrigation & Water Resources Department buatsaih ‘State Hydro-Met Data Centre & Water Quality Laboratory’ chu nimin khan Irrigation & Water Resources Department Minister PC. Vanlalruata chuan a hawng.

Dinhmun zirchian hmasakna tel lo chuan hmalak dan tur ruahmanna siam a harsat thin thu I&WRD Minister chuan sawiin, National Hydrology Project hnuaiah Mizoram a tui kan neih dan dinhmun chiang tak a lakkhawmna, 'Real Time Data Acquisition Centre' leh ‘Water Quality Laboratory’ hawng thei a buatsaih a ni chu lawmawm a tih thu a sawi a. Ram tihmasawn tur chuan Sawrkar department hrang hrang hnuaia thawktuten thiamna thar hmanga kuthnathawktute nen tangrual a thawhho an thiam a tul thu a sawi bawk.

National Hydrology Project (NHP), Central Sector Scheme hi kum 2016 atang khan India rampum ah kalpui a ni a, Mizoram State tana Implementing Agency chu Irrigation & Water Resources Department (I&WRD) niin NHP hian thil tum lian tak a neih chu India ram pumah Water Resources Data rintlak lakkhawm a, awmze nei tak a dah khawm leh a hmang tangkai tur hnena pekchhuah a ni.

State Hydro Meteorological Data Centre-ah hian Technology thar ber ber hmangin tuna thleng mek (real time) data, lui tui luang zat, ruahsur zat, tuihu kal zat, boruak hnawn dan, thli thawt dan, khaw lum leh vawh dan, boruak nekna zat, ni sat dan leh lei hnuai a tui awm dan te hriat theih a ni a, chumai ni lovin tunhma a thleng tawh (historical) data pawh kan hmu thei a ni. Kan tui neih zat dik tak leh a chet vel dan kan hriat chian chuan a tul hunah domestic atan te, Agriculture atan te leh Industry atan a kan tui insem dan tur ruahmanna mumal tak, data rintlak a innghat (data based water allocation), neih theih a ni ang.