Kumin ah Heroin kg. 80 chuang man leh tawh

Mizoram Police leh Excise & Narcotics Department te chuan kumin kum chanve (January leh June inkar) chhung khan Heroin kg. 80 leh gram 8 an man.

Kumin kum chanve chhung hian Mizoram Police te hian Heroin kg. 46 leh gram 348 man tawhin Excise and Narcotics Department te pawhin kg 30 leh gram 660 an man tawh a, hemi hun chhung vek hian Police-in Methamphetamine kg 89 leh gram 445 an man bakah Crystal Meth kg 13 leh gram 49 an man bawk a. Methamphetamine mum an man hi cheng vbc. 11.63 hu niin Crystal Meth hi a mum ni lovin tengkhang an chi a ni a, a man a to in kg 13 chuang hret hi cheng vbc. 40.47 man nia chhut a ni. END hian Methamphetamine kg 112 leh gram 528 an man thung a. Police ten Ganja kg. 112.94 an man bakah END-in kg. 418.462 an man bawk. Police Department-in tun thla ruk kalta chhunga an ruihhlo man zawng zawng hi cheng vbc. 66.96 hu niin an chhut a, Ruihhlo kaihhnawih ah mi 270 manin ND&PSAct, 1985 hmangin thubuai 199 an ziaklut bawk.

Hetihlai hian kumin January thla atanga June ni 25 thleng khan Mizoram-ah ruihhlo hmansual vangin mi 42 an thi tawh a, an zing a mi 7 te chu hmeichhia an ni a. Ruihhlo vanga thi zinga 31 hi Heroin vanga thi an ni a, mi 11 chu Heroin leh damdawi dang khawih kawp vanga thi an ni bawk. END chhinchhiah danin kum 1984-a Heroin avanga thi pakhat an chhinchhiah tan atanga kumin June ni 25 thleng khan ruihhlo vangin mi 1,854 an thi tawh a, an zinga mi 1,630 hi mipa niin hmeichhia 224 an thi tawh bawk. Ruihhlo hmansual vanga thi zawng zawng zinga 1,161 hi Spasmo Proxyvon leh Parvon Spa vanga thi an ni a, kum 2017 atang erawh chuan heng nachhawkna hmansual vanga thi hi an awm leh tawh lo thung a ni.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man