Ayushman Arogya Mandir tia hming thlak duh lo

Central Sawrkar chuan ramchhunga ‘Health and Wellness Centre’ te chu ‘Ayushman Arogya Mandir’ tia thlak turin ruahmanna a siam a, Mizoram Sawrkar chuan a duh lo thu thlen tawhin Meghalaya leh Nagaland te pawhin an duh loh thu an thlen tawh a ni.

Central Sawrkar chuan an Flagship Programme Ayushman Bharat Health and Wellness Centre ramchhunga nuai 1.6 te chu hming thar chu ‘Ayushman Arogya Mandir’ a thlak a lo rel tawh a. Hemi chungchangah hian Union Health Ministry chuan nikum November thla khan thupek tichhuakin, State leh Union Territory zawng zawngte chu hming thlakna chu nikum chhunga tifel turin a ti a ni.

Mizoram Sawrkar chuan nikum December thla khan hming thlak chungchangah hian ngaihhnathiamna pe turin sawrkar laipui ah ngenna an thlen a, lehkhaah chuan Mizoram chu Kristian State, a mi cheng zaa 90 vel Kristian Sakhaw zuitu an nih thu te, chumi avang chuan hriselna lama inenkawlna hmun ‘Mandir’ tih hming put tir chu a rem loh thu ziahlan a ni a. Hemi chungchang zawhna chhangin Mizoram sawrkara thuneitu sang te chuan hming thlak chungchanga ngaihhnathiamna pe tura an dilna chu tun thlengin chhan a la nih loh thu leh a chhanna hi an la nghah mek thu sawiin, Hindu Sakhaw zuitute Biak In hming ‘Mandir’ tih hming pua inentir chu Mizo mipui te’n an duh dawn lo niin an sawi a ni.