Kan ramah Pathian ram lo thleng se tih hi kan auhla ber a ni - Chief Minister

Chief Minister Lalduhoma chuan ‘Kan ramah Pathian ram lo thleng se’ tih chu an auhla ber a ni tih sawiin, an Policy pawimawh bik pasarih zingah a hmasa berah an dah thin thu a sawi.

Baptist Church of Mizoram (BCM) Headquarters Office, Serkawn nimin-a tawngtai inkhawm a hmanpuina ah Chief Minister chuan he thu hi sawiin, ram hmasawnna hnathawk turin sawrkar, Kohhran leh tlawmngai pawlte hi an pawimawh thu a sawi a. BCM Kohhran pawh Thlarau lam rawngbawlna baka Education Concern lam te, Orphanage Home te, Ruihhlo ngai enkawlna te, Skill Development lamah te hmalakna tha tak tak an nei tih a hriat thu leh ropui a tih thu a sawi a. Sawrkar enkawl zirna In te aia Kohhran enkawl zirna In te chu kawng tam takah an that zawk fo avangin heng kohhran enkawl zirna In te thawhpuia tanpui dan tur pawh an dap chho dawn tih a sawi a. Heng bakah hian ruihhlo ngaite enkawl leh ruihhlo do thua sawrkar ruahmanna te sawiin, kohhran hrang hrangten thawhhona tha zawk neih theih zel tha a tih thu pawh a sawi a, MPF awm lohna khuaah chuan MLA candidate te tan campaign-na senso a sang bik thin tih chu a tak ngeiin a hmuh thu a sawi bawk.

BCM Office-a Tawngtai Inkhawm hi Rev R. Lalbiakliana, General Secretary chuan kaihruaiin Rev. R. Lalnunzira, AGS chuan lawmthu sawiin Baptist Church of Mizoram Kohhran in sawrkar a beisei dan leh a duhsakna te a sawi a. Rorel tura lal ringawt lova, lal bawk, hnathawk bawk an nih an beisei thu a tarlang a. Sawrkar kal zelna turah duhsakna a hlan a ni. Serkawn-a BCM Headquarters Office-ah hian thawktu mi 72 vel an awm a ni.