Damdawi In tha tehna ah damdawi In pahnih tling

Ramchhunga sawrkar Damdawi In tha bik thlanchhuah zingah Mizoram atangin Haulawng Primary Health Centre leh Chawlhhmun Urban Primary Health Centre te telh an ni.

Sawrkar damdawi In tha bik tehna, National Quality Assurance Standard (NQAS)-ah heng damdawi In pahnih te hi an tling a. Damdawi In tha a tling tur hian State Level leh National Level atangin tehna hrang hrang paltlangin Haulawng Primary Health Centre hian zaa 90.6 hmuin Premium ah an tling a, Chawlhhmun Urban Primary Health Centre hian zaa 87.9 a hmu bawk a. Damdawi In tha tehna-ah hian tehna hrang hrang 2000 chuang a awm a ni.

Mizoram-ah hian Civil Hospital Aizawl, Aibawk Primary Health Centre, Thingsulthliah Primary Health Centre leh ITI Urban Primary Health Centre te chu damdawi In tha a thlan an lo ni tawh bawk a. National Health Mission (NHM)-a Mission Director Dr. Eric Zomawia chuan ramchhunga damdawi In tha bik a thlanchhuah an neih belh zel chu Mizoram tan mellung pawimawh tak a nih thu sawiin, hemi kawnga thawktu zawng zawng te chhuanawm a tih thu a sawi a, an thawhrimna leh taimakna-ah lawmthu a sawi bawk a ni.