Kan beisei Development kan duh lo niin sawi

BJP Mizoram State President Vanlalhmuaka chuan kan beisei Development kan duh lo tih kan Vote kan thlak dan ah a lang chiang niin a sawi.

BJP hian nimin khan Aizawl-a an Party Office-ah Karthar Inhlanna leh Political Session neiin he hunah hian an President Vanlalhmuaka chuan Mizoram-ah Development beisei mipui tam tak an awm tih sawiin, “Kan beisei Development erawh kan duh lo tih kan Vote kan thlak danah a lang chiang a, Vawiin-ah chuan kalphung thar hnuaiah beiseina sang tak nei chungin, beiseina erawh kan tisang thei tawhlo tih a chiang hle in a lang tawh a, kan State Sawrkar hian thil tha tih an duh tih a chiang a, nimahsela thil tha tih theihna erawh an neilo tih hi mipui hian kan chiang hle in a lang a ni,” a ti a. “Sawrkar hmasa anga kum 5 chhunga thiam taka mipui rilru sukthlek mila chhuanlam siam a hun an hman leh mai pawh a hlauhawm hle a ni,” a ti bawk.

Kum 2023 MLA Inthlanpui leh kum 2024 MP inthlanpui a BJP Manifesto te chu tih theih vek a nih thu BJP President chuan sawiin, “Nimahsela Vawiin ah erawh Mizoram mamawh êm êm kan Manifesto te kha tih theih a nilo a ni. A chhan chu mipuite'n min rinloh vang a ni. Pathian Malsawmna dawng tur pawh hian amah a innghat a, amah rin ngam a ngai ang hian Central atanga Malsawmna tak tak kan neih theihna tur chuan Central Sawrkara rinna nghah hi a ngai a ni,” a ti bawk.