Hnu chhui tura CBI remtihna pek kawngah ZPM sawrkar a hnungtawlh dawn lo niin sawi

ZPM Legal Department chuan Mizoram-a hnu chhui tura CBI hnena remtihna pek kawngah ZPM sawrkar chu a hnungtawlh dawn lo tih sawiin, Kuhva tawlhruk chu CBI chhuitir ngei ngei chu ZPM duhdan a ni tih an sawi.

ZPM Legal Department hian nimin khan Aizawl-a an Party Office-ah thuthar thehdarhtute kawmin an General Secretary Vanlalsiama Pachuau chuan ZPM Party kaihhruai Sawrkar chuan Campaign-laia a intiam ang ngeiin, nikum December ni 28 khan CBI hnenah General Consent a lo pe tawh tih a sawi a. Nikum December ni 22 khan Parliament-a pass tawh Criminal Law pathum (3) chu kumin July ni 1-a hman tan tur a nih tak thu leh Dan thar hman a lo nih dawn takah chuan thla hmasa ni 20 khan Director, CBI chuan Mizoram Sawrkar Chief Secretary hnenah lehkha thawnin Criminal Law thar hman tan a nih dawn vanga Mizoram Sawrkar-in CBI hnena Consent a lo pek tawh chu tun thla, July ni 1, 2024 hma ngeia a thara Gazette Notification tichhuak turin ngenna a thlen thu an sawi a. Mizoram sawrkar chuan a thar hlaka Notification chhuahin CBI hnenah hian General Consent a pek thu a sawi a ni.

CBI in notification thar siam tura a ngenna chhan hi, Mizoram saworkarin CBI hnenah General Consent a pekna chu Section 3 of Delhi Special Establishment Act, 1946 hnuaia Central Sawrkarin IPC hnuaia thilsual tihnate chhui theihna chauh a nih vang a ni tih pawh sawiin, Dan thar hman a nih tak avangin Mizoram Sorkar hian a thar hlaka notification chhuahin, CBI hnenah General Consent a pek thar a ngai a; Chuti lo chuan CBI ten dan thar hnuaiah Mizoramah thil an chhui thei dawn lo niin an sawi bawk.

ZPM Legal Department chuan eirukna kaihhnawiha CBI chhui remtihpuina pek a ngaih chuan Mizoram sawrkar a tlanchhe ngai dawn lo tih pawh sawiin, Ministry kalta hun laia Corruption Case langsar tak tak Lokayukta-a la inchiah mêk School thuamthatna chungchanga NABARD sum chingpen thu leh Ropeway leh Skywalk chungchang ACB-in an chhui mêk te, Lengpui Airport sak chungchanga Mizoram First FIR thehluh, MNF Ministry hun laia ACB lama an tihtawp tâk te chu CBI hian chhui ngêi se an duh takzet tih an sawi a. Mipui chanai leh ram hmasawnna sum tihchingpenna kawng hrang hrangah thilsual titu te hrem an nih theihna turin Mizoram sawrkar chuan hma a la zel dawn a, Eirükna do kawngah khawng takin ke a pên zel dawn a ni, an ti bawk.