Insawi loh dan hlira awm ah ZPM sawrkar puh

MNF General Secretary Er. K. Lalsawmvela chuan ZPM Sawrkar chu mipui sawrkar inti chung siin, an insawi loh dan hlirin an awm niin a sawi.

Nimin-a Mizo Hnam Run Chhung Inkhawm-ah MNF General Secretary Er. K. Lalsawmvela chuan tuna kan Sawrkar hruaitu Super CM inti, Lalduhoma leh a hote hian Inthlan hma khan thu tam tak sawiin, nasa takin an intiam nia sawiin, “MNF leh Congress-in kum 36 chhung min hruai tawh a, heti zawng hi kan ni, tiin, Sawrkar hmasate kha engmah ti lo, chhe lailet derin an sawi a. Mahse an insawi loh dan ang zelin an awm,” a ti.

ZPM chuan an sawrkar tirh December 2023 atangin kumin April tih loh chu thlatin OMB hmangin an puk tih pawh Er. K. Lalsawmvela chuan sawiin, “Chutianga an puk chu June thleng hian cheng vbc. 602 a ni a. Chu bakah Ways & Means Advance hmangin cheng vbc. 1,280 vel an puk bawk a. Thla 6 lek chhunga an puk belhkhawm chu cheng vbc. 1,859.94 a tling der tawh,” a ti a. “Sum puk chhan an mipuite hnenah an puang zar ngai lova, hetianga an kal zel chuan kum 5 chhung chuan cheng vbc. 18,600 a tling dawn tihna a ni,” a ti a. Hetianga sum puk vak vak a development awm leh si lo hi a chhan sawifiah se a duh thu pawh a sawi bawk.