Champhai District-a Leilet-ah buh phun mek

Champhai District chhunga Leilet hrang hrangah buh phun runpui a thleng mek a, kumin hian ruahtui a tlak that avangin Buh phun kawngah harsatna awm lo tura ngaih a ni.

District Agriculture Officer (DAO) Champhai R. Lalramhluni sawi danin, kumin hian Ruahtui a tla tha a, Champhai District chhungah Tui awm loh avanga buh phun thei lo an awm hriat a ni lo a, Champhai zawl bakah Hnahlan rama Laliphaiah te, Ngur khaw rama Zilhri phaiah te leh Tiau luidung a leilet hmun tam zawkah buh phun runpui a thleng chho mek a, tun thla chawhma lamah chuan buh phun hi zawhfel hman beisei a ni. Kumin atang hian Mizoram-a Leilet zawl zau ber, Champhai zawl-ah a vawikhatna atan Buh chi Hybrid 6444 Arize Gold chin chhin a ni dawn a, Champhai District chhunga chhungkaw 20-ten he buhchi hi an ching chhin dawn a ni.

Kumin hian Champhai zawl bikah khawl hmanga buh phun uar zual niin leilet neitu ten buh phun tura Rate sang taka hlawhfa an chhawr thin chu khawl hmanga buh phun hian nasa takin leilet neitute harsatna a sutkian sak niin DAO chuan a sawi bawk. Hetihlai hian kumdanga tui kawng neih that loh vanga buh phun theih lohna hmunah te chuan Vaimim chin uar zual a ni a, Champhai District a khaw pasarihah chuan Vaimim leh Bekang uar zawka chin mek a ni bawk.