Hlimen Relief Camp sakna atan sum la pek loh lungchhiatthlak an tih thu MLP in an sawi

Mizoram Legislative Assembly-a Leader of Opposition Lalchhandama Ralte chuan sawrkar-in Hlimen Relief Camp sakna atan tun thlenga cheng khat pawh a la pe lo chu lungchhiatthlak an ti hle tih a sawi.

MNF Legilature Party (MLP) hian nimin khan Hlimen-a khawtlang tangrualin Relief Camp an sak mek chu tlawhin he hunah hian Lalchhandama Ralte chuan khawtlang tangrualin cheng nuai 20 chuang an seng tawh chunga sawrkar a la ngawi thei chu mak an ti hle tih a sawi a, sawrkar laipuiin chhiat tawkte chhawmdawlna tur sum India ram State-te a pek chu hreng khawtlai lo leh pawtpeng loa pechhuak zung zung turin sawrkar an ngen tih a sawi.

Chief Minister-in Cyclone Remal avanga chhiat tawkte tuamhlawmna tur cheng vbc. 15 ruahman a nih thu a sawi hnuah thla khat chuang a liam tawh thu leh heti chunga Relief Camp sakna pawh sum an la pechhuak thei lo chu mak a tih thu sawiin Lalchhandama Ralte chuan, niminpiah-a Zemabawk-a vanduaina thleng tuartu chhungte pawh installment lovin, a vaia tuamhlawmna leh ralna sawrkarin a rang lamin pe se a duh tih a sawi bawk.

MNF Legilature Party (MLP)-te hi Hlimen Relief Camp hotuten lo dawngsawngin, Relief Camp pahnih sak zawh tawh In pahnihah chhungkaw 20 an riak lut tawh tih an sawi a, Relief Camp-a awm duh, Camp la sak loh avanga awmna la nei lo chhungkaw 21 an la awm thu an sawi bawk. Sawrkar atangin cheng khatmah Relief Camp sak nan an la dawn loh thu leh, an dawn ngei an beisei thu an sawi a, an bialtu MLA atangin Camp sakna tur Fund an dawn loh thu an sawi bakah an veng dawrah cheng nuai 20 chuang man a ba thlauin In sakna hmanrua an la tawh tih an sawi bawk a ni. Relief Camp hotute hian zawhna chhangin Disaster Management & Rehabilitation Minister-in an Camp a la tlawh loh thu an sawi a. An bialtu MLA atangin Camp sakna tur Fund an dawn loh thu an sawi bawk. Tarlan tawh angin Hlimen-a leimin avang hian chhungkaw engemaw zat te chu hmun him lamah chhuak tura tih niin Central Workshop Hlimen-ah hian Relief Camp tur hi sak a ni.