Dan thar pathum chungchang ah Media Workshop nei

Ministry of Information & Broadcasting, Govt. of India leh Press Information Bureau (PIB), Aizawl tangkawp buatsaihin Dan bawhchhiate hremna dan thar pathum (3) chungchangah nimin khan Media Workshop neih a ni.

Aijal Club-a Media Workshop neih hi Mizoram Legislative Assembly Speaker Lalbiakzama chuan khuallian nia hmanpuiin Dan hriat loh chu hremna pumpelhna atan chhan tha tawk a tling lova, dan chu mi zawng zawng tana siam a nih angin dan thar inhrilhhriatna leh zirhona buatsaih a ni chu lawmawm a tih a thu a sawi a. Thil tisual te hremna dan pathum, Indian Penal Code (IPC) 1860, Criminal Procedure Code 1973 leh The Indian Evidence Act, 1872 te chu dan upa tawh tak, vawi tam tak siamthat tawh niin heng dan pathum British te hnam ze mila siam kan lo hman thin chu India ram milin July ni 1, 2024-ah thlak a nih tak thu a sawi bawk. Heng Dan tharte hi kalphung mumal zawka Mizoramin kan hman theih nan a kaihhnawih Department, a bikin Law Department leh Home Department te chak taka inbuatsaih a, hma la tura ngenin Dan siam a nih chhan mipui hrilhhriat chu darh zau taka kalpui a, Dan thar hnuaiah mipuite thlamuang taka awm turin duhsakna a hlan a. Thuthar thehdarhtu te chu heng Dan thar pathumte mipui nawlpui hrilhhriatna kawngah leh zirtirna kawngah an pawimawh hle tih a sawi bawk.

He hunah hian khual zahawm IGP (Law & Order) Lalbiakthanga Khiangte pawhin Dan thar chungchanga hriat tur pawimawh hrang hrangte tarlangin Mizoram Police te inbuatsaih dan te a sawi a. “He dan thar hi Victim Centric a nih mai dawn bakah mipui nawlpui a bik takin hmeichhia leh naupangte a humhalh hle dawn a, Victim Compensation pawh a ngai pawimawh hle bawk a ni,” tiin dan tharah hian 'justice delayed is justice denied' tih piahlamah he dan hian kan Justice System rei lutuk thin chu a ranglamin a chingfel zung zung tura beisei a nih thu a sawi a. Case ngaihtuah lai pawh adjournment vawihnih aia tam phal a nih tawh dawn loh thu a sawi bawk. Tunlai thiamna hmangin FIR leh thildang pawh Electronics Communication hmangin thehluh theih a ni tawh dawn a. FIR copy pawh Police hnen atangin a copy a thlawna-a a neih theih dawn bakah pawikhawihna, hnuchhui dan, hmalakna leh thlen chin te hriat theihna right a awm tawh dawn thu a sawi bawk.

Nimin-a Media Workshop neih hi Satish Nambudiripad, DG, NE Zone chuan kaihruaiin Govt. Mizoram Law College-a Associate Prof. P. Lalremruati chuan Criminal dan thar pathum Bharatiya Nyaya Sanhita (BNS) 2023, Bahratiya Nagarik Suraksha Sanhita (BNSS) 2023 leh Bharatiya Sakshya Adhiniyam (BSA) 2023 awmzia leh kalphungte kalkhawmte zirtirna a pe a ni.