MoS for Agriculture & Farmers Welfare leh Agriculture Department-a thawktute an inkawm
Union Minister of State for Agriculture & Farmers Welfare Bhagirath Choudhary chuan nimin khan Mizoram Sawrkar hnuaia Agriculture & Farmers Welfare Department-a thawktute a kawm.
Aijal Club Conference Hall-a he inkawmna hi Mizoram sawrkar-a Agriculture Deparment changtu Secretary Ramdinliani chuan kaihruaiin Agriculture Department-a Deputy Director Dr. Samuel Lalliansanga chuan Mizoram-a buh leh thlai thar kawnga hmalakna leh dinhmun hrang hrang PowerPoint Presentation hmangin a entir a. Union Minister of State for Agriculture & Farmers Welfare Bhagirath Choudhary chuan ram tihmasawn tur chuan loneitute tih hmasawn hmasak a tul thu sawiin, hemi kawnga hmalakna ah hian Central leh State Sawrkar a thawktute tanrual a pawimawh thu a sawi a. Central leh State Sawrkar hnuaia Agriculture & Farmers Welfare department-a thawktuten ruahmanna siamin an thutkhawm fo a tul thu a sawi.Union Minister of State Bhagirath Choudhary chuan loneituten an thil tharchhuahte awlsam zawk leh man man zawka an hralh theih nan ruahmanna tha siam a ngaih thu te, inkalpawhna leh loneituten an thil tharchhuah rei tak an dahthat theihna tur ruahman a tul thu a sawi a, hemi kawng a mamawh hrang hrangte phuhru tur hian Sawrkar laipui chuan tanpui an inpeih reng thu a tarlang bawk a ni. Kuthnathawktute tihmasawn tur a mithiam bik awmna, Krishi Vigyan Kendra (KVK) chu hmang tangkai tur leh loneituten an thawhrah dik tak an hmuh ngei theih nan a tan la turin a fuih a. Loneitute chu ram innghahna pawimawh tak an nih angin an dinhmun chawikang tura hmalakna ah tan la zel turin kalkhawmte a chah a, loneitute sum dehchhuah a let li a tih pun a nih theih nan thawhho pui ah a sawm bawk a ni.
He thutkhawmna ah hian Mizoram Sawrkar hnuaia Agriculture & Farmers Welfare Department-in Sawrkar laipui Scheme hrang hrang a kalpuite tarlan niin July ni 18, 2024 thleng khan PM-Kisan hnuai dilna lut loneitu mi nuai 2 chuang zingah mi 1,19,259 te chu dawng thei zinga an tel thu te, Mizoram District 3-ah Pradhan Mantri Fasal Bima Yojana kalpui tan tura hmalak a nih dan te, Farmer Producers Organisation 47 din a nih tawh thu te tarlan a ni a, Pesticides, Fertilizer leh Seed dealer neih dan dinhmun te sawi a ni bawk. Heng bakah hian Mizoram District 7-ah Oil Palm huan siam loneitu 10843 an awm thu leh kumin thleng hian Oil Palm rah MT 55936 hralhchhuah a nih tawh thu he hun ah hian tarlan a ni a, Sawrkar laipui hnuaia Scheme chak zawka kalpui a nih theih nan sum ruahman sa te chak tak a pekchhuah a tul thu sawilan a ni bawk.
Comments
Post a Comment