Durtlang-ah Eco-Herbal Garden siam a ni

Mizoram Pollution Control Board (MPCB) leh State Medicinal Plants Board Mizoram, Directorate of AYUSH tangkawp chuan nimin khan Govt. J. Thankima College Northern Campus, Durtlang hmunah ‘Eco-Herbal Garden’ an din a. He hunah hian Govt. J. Thankima College Eco-Club zirlaite chu ramhmul damdawi thatna leh chin uar a pawimawhna zirtir an ni.

‘Eco-Herbal Garden’ hi Ministry of Environment, Forests & Climate Change (MoEF&CC) bultuma siam niin Environment Education Programme (EEP) hnuaiah kalpui a ni a. Mizoram Pollution Control Board chuan EEP hnuaiah hian Mizoram chhunga School leh College hrang hrangah Eco-Club 1570 chuang a enkawl mek a ni. Environment Education Programme (EEP)-in a tum ber chu Eco-Club School leh College zirlai naupangte hnena Class room-a an zirlai piah lama Environment humhim kawnga an thanharh theih nana zirtirna kawng hrang hranga pêk a ni.

Nimin-a he hun hman ah hian Resource Person atan Dr. Lalram-muana Sailo, Consultant (Medicinal Plants), State Medicinal Plants Board, Mizoram, Directorate of AYUSH chu hman niin ramhmul damdawi atana hman chi thlai leh thing hrang hrangte natna enkawl nâna an thatna leh hlutna te a hrilhfiah hnûah Eco-Herbal Garden hi siam zui a ni a. Ramhmul damdawi - Neem, Tejpatta, Sunhlu, Aloe Vera, Kumtluang, Rûnhmui, Archang-kâwm leh a dangte phun a ni a, he Eco-Herbal Garden hi Govt. J. Thankima College Eco-club-te’n an lo enkawl chhunzawm dawn a ni.