DIET Lunglei in an kum 50 tlinna an lawm

Zonuna Kawlni (LENKAWL) • July 12, 2024 • Comments • Mizoram

District Institute of Education and Training (DIET), Lunglei chuan nimin khan an kum 50 tlinna, Golden Jubilee an lawm a, he hun hi Lunglei High Powered Committee (HPC) Vice Chairman V. Malsawmtluanga chuan khuallian niin a hmanpui a ni.

DIET Lunglei hi September ni 28, 1974 khan ‘Under Graduate Teachers' Training Institute’ (UGTTI) tih hming pu-a din a ni a, July ni 4, 1980-ah ‘Teacher Training Institute’ (TTI) tia a hming thlak niin February ni 4, 1993-ah ‘District Institute of Education and Training’ (DIET) tia thlaka tihlen a lo ni leh ta a ni. Kum 1975-2023 chhungin Diploma in Teacher Education (D.T.Ed), Diploma in Education (D.Ed), Diploma in Elementary Education (D.El.Ed) leh Work Education (WE)-ah te zirlai (candidate) 4,406 awmin, zirlai 4,419-in an zirchhuak (pass) a. Kum 2020-2023 chhungin Bachelor of Education (B.Ed) zirlai 191 zinga 186-in an zirchhuak bawk.

DIET Lunglei-ah hian tun dinhmunah thawktu 30 (Teaching Staff 15 leh Non-Teaching Staff 15) an awm mek a. D.El.Ed-ah seat 100 (unit 2) leh B.Ed-ah seat 50 (unit 1) an nei mek a ni.