RMIS (NEC) kalpuina turin Computer semchhuak

Rural Development Department chuan North Eastern Council hnuaia Rural Monitoring & Information System kalpui nana Computer set leh hmanraw dang an dawn te chu nimin khan an semchhuak.

Heng Computer leh hmanraw dang semna puala Inkhawm RD Conference Hall, Aizawl-a neih hi RD Minister Prof. Lalnilawma chuan hmanpuiin Rural Development Department tih changtlun nana RMIS (NEC) a tak a hman theih tura ruahman a ni ta chu a sul lo su hmasatute thawhhrimna leh inpekna vang a nih thu sawiin, a thil tum tih hlawhtlin ngei a nih theih nan tuna thawktute an pawimawh hle thu a sawi a. Mipuiin Rural Development Department awlsam zawka an dawr theih nan leh hmasawnna hna sawt zawka kalpui a nih theih nan RMIS chu tangkai tak a hmang tura chahin, a nih dan tur ang taka hman a nih theih nan thawktute pawhin a hman dan zir thiam tum vek turin a chah bawk a ni.

RD Minister chuan Rural Development Department chu thingtlang khawsak dinhmun chawikan leh tih hmasawn hna thawktu an nih angin Mizoram-a khaw hrang hranga harsatna awmte zirchiang turin an awm kual tam a pawimawh thu a sawi a. Ruahmanna tha siam tur chuan thawktuten tawnhriat an neih tam a tul thu a sawi a. Rural Monitoring & Information System kalpui bungrua te chu tangkai taka hman a nih theih nan RD Secretariat, Directorate of RD, DRDO Office 11 leh RD Block Office 28 aiawh a lo kalte hnen ah a hlan nghal a ni.

He hun hi Rural Development Department Director K. Lalrohlua chuan kaihruaiin A.Chhalai, Executive Engineer chuan Technical Report a pe a. NEC Scheme hnuaia Rural Monitoring & Information System (RMIS) Project hian RD Secretariat, Directorate of RD, DRDO Office 11 leh RD Block Office 28 te tan Computer 55 leh a kaihhnawih hmanrua dang te, Software Development-te, Server System-te leh Project atana Skill Development Training a huam a. RMIS Project hi cheng nuuai 249.00 hu niin NEC atangin 1st leh 2nd Installment atan cheng nuai 200.096 hmuh a ni tawh a, tunah hian nuai 48.904 hmu leh tur a beisei a ni.

He Project hian a tum chu Rural Development Department hnuaia Office hrang hrangte Software Application hmanga thlunzawm a ni a, RD Department hnuaia hmalakna tha zawk leh chak zawka kalpui a nih theihna atan a ruahman a nih thu Technical Report-ah hian tarlan a ni a. RMIS hnuaia bungrua semchhuahna hun hman zawh hian RMIS hmanga hnathawh dan hrang hrang entirna hun chu Rural Development Department Director Pisa-ah neih leh a ni a. RD Minister hian Directorate of Rural Development building fangkualin thawktute nen inkawmhona hun a hmanpui bawk a ni.