CM in a nawr hnuah raltlan te State kutah hlan an ni

Bangladesh atanga sahimna zawnga Lawngtlai District a tlanlut mi 126 te chu sawrkar in hma a lak hnuah nimin tlai khan Border Security Force ten Lawngtlai District thuneitute kut ah an hlan.

Bangladesh atanga raltlan mi 93 te hian July 3, 2024 khan Mizoram-a Damdep-II an rawn lut a, dan lo a ramri kan an nih vangin BSF te hian Bangladesh lamah nawrkir turin hma an la zui a, an dinhmun hi District thuneitute piahlamah State Sawrkar-a thlen a nih hnuah nimin tlai khan BSF te hian Lawngtlai District thuneitute kut ah an hlan a, Police hotute leh Magistrate ten dawngsawngin, a tira mi 93 kha midang 33 in belhin an vaiin mi 126 an ni.

Raltlan te chungchang ah hian Chief Minister Lalduhoma chuan ramri kan-a Mizoram chhung an lo thlen tawh chuan, State sawrkar mawhphurh a nih thu leh engti kawng mahin thawnkir rem a tih loh thu Prime Minister Narendra Modi-a nen an inkawmna ah a lo sawi tawh a. Home Minister K. Sapdanga hnen atanga thu kan dawn danin heng raltlan te hi Inrinni khan nawr kir turin ramri bul Kamtuli-ah an phur kir hman a. Home Ministry atanga thu an hmuh tak avangin BSF hian Kamtuli atangin Chhippui khuaah an phur kir leh a, nimin tlai dar 3:30 khan mi 42 phurh thlen an ni tawh a. Chhippui khuaah enfel ngaite an enfel zawh hunah Chamdur ‘P’ an panpui a, State Police kutah an hlan a ni.

Central Young Lai Association chuan Myanmar atanga sahimna zawnga rawn lut te nawrkir leh nawrkir tuma hmalak a nih ngai loh leh zalen taka an rawn luh theih laia Bangladesh atanga kan unaute an sahimna zawnga rawnlut ten harsatna an tawk fo chu hriatthiam har an tih thu leh an chungah hetiang hi thleng zui tawh lo se an duhthu an sawi a ni.