MHIP Golden Jubilee lawmna Home Minister in hmanpui

Mizo Hmeichhe Insuihkhawm Pawl (MHIP) kum 50-na, Golden Jubilee chu Inrinni khan Mizoram hmun hrang hrangah lawm a ni a, a lawmna pui ber Aizawl Sipai Lammual-a neih chu Home Minister K. Sapdanga chuan khuallian niin a hmanpui a ni.

Aizawl-a MHIP Golden Jubilee lawmna hunah hian Home Minister K. Sapdanga chuan tlawmngai pawl hlutna a hrechiang tih sawiin, Mizoram-a tlawmngai pawl awm te chu Missionary-te hrin niin an din hun inang lo mah se a thil tum chu Mizo puite an thatna tura rawngbawlsak a ni tih a sawi a. YMA, MHIP leh MUP te chu chhulkhat chhuak an ni tih a sawi bawk. Home Minister chuan vantlang hnathawh kawngah MHIP chuan tlawmngai pawl dangin a tih remchang ni lem lo, mahse MHIP-in a tih remchang tam tak a awm tih sawiin, kum 50 chhunga MHIP-in vantlang tana hna a thawhte chu a tamin sawrkar sum-a thawh sen rual loh a ni, a ti a. Khawtlang nunah Mizo hmeichhia te chu kawng hrang hranga hmahruaitu pawimawh an ni tih pawh sawiin, zirna leh sawrkar hnaah pawh hmeichhia an tamin Mizoram sawrkar chu hmeichhe kut tel loin a kal thei lo ni bera a hriat thu a sawi bawk.

He hunah hian Khualzahawm Social Welfare Minister Lalrinpuii pawhin tunhma chuan Mizo hmeichhe zingah tanpui leh chhawmdawl ngai an tam thin thu leh tunhnua ah erawh MHIP hmalakna avangin chhungkaw thenkhat a hmeichhe rahbi tleu deuh te awm mah se hmeichhia ten hma an sawn nasa tawh tih a sawi a. Tunhma ang lo deuhin Mizo nu ten chhungkaw sum an vawng a, hei hi a lawmawm rualin mawhphurhna a keng tel tih hriat a ngai tih pawh sawiin, Hmeichhia, a bikin Nu ten Sakhua leh Hnam nunphung vawng him turin Mizo hmeichhia te an thanharh a pawimawh a. Fate zirtirna nghet pek a, zirtirna dik pek a ngai tih sawiin, ruihhlo dona tha ber pawh chhungkua atanga tan tur niah a ngai tih a sawi a, chhungkaw hlim tak siam turin hmeichhia te an pawimawh tih a sawi bawk.

MHIP Golden Jubilee lawmna hi Mizoram hmun hrang hrangah pawh uar taka neih a ni a, Lunglei-ah chuan Lunglei MHIP Sub-Hqtrs. huaihawtin Lunglei-a Branch hrang hrang ten Saikuti Hall-ah a huho in an lawm a, Mamit-ah bawk Sub-Hqrs. MHIP huaihawtin Branch hrang hrang ten Mamit Chhim Veng YMA Hall-ah a huho in an lawm bawk a. Kolasib-ah chuan MHIP Golden Jubilee lawmn hi YMA Hall-ah neih niin Bialtu MLA leh Assembly Deputy Speaker Lalfamkima chuan a hmanpui a. Champhai District-ah pawh MHIP Branch hrang hrang ten Golden Jubilee hi lawmin Saitual-ah pawh Branch hrang hrang ten an remchan angin an lawm bawk a ni. Kumin-a MHIP Golden Jubilee hi ruai nen hmun hrang hrangah an lawm hlawm a ni.