Mizoram-a Myanmar raltlan awm mek te Biometric hmanga chhinchhiah hun tur pawtsei

Sawrkar laipui chuan Mizoram a raltlan mek Myanmar mi 33,800 chuangte biometric hmanga chhinchhiah hna kalpui tur hun chu December thla thlengin a pawtsei a. Tun dinhmunah Mizoram hmun hrang hrangah Myanmar atanga rawn raltlan hi mi 33,823 an awm mek nia hriat a ni.

Home Department atanga thu dawn danin Myanmar tualchhung buaina avanga an sahimna zawnga Mizoram-a raltlan awm mekte Biometric hmanga chhinchhiahna tur atan hian sawrkar laipui thu hnuhnung nghah mek a ni a. A hma lama Ministry of Home Affairs (MHA)-in Biometric Enrolment Portal a siam chu ramdangmi India rama rawn lut, an rama thawnlet turte tana duan a nih avangin siamthat a ngaih thu Home Department chuan an sawi a. Siamthat rawtna an thawn hi MHA lam chuan an la rawn chhang lo a ni.

Union Home Minister Amit Shah chuan Chief Minister Lalduhoma hnenah Myanmar raltlante chu an ram-a muanna tluantling a awm hma chuan thawnkir an nih loh tur thu a lo tiam tawh a. Chuti chung chuan thawnkir turte puala Biometric Enrolment Portal an rawn duan leh si avangin siamtha tura an ngenna chu Mizoram sawrkarin a nghak mek a. June ni 18-a Council of Ministers thukhawm chuan sawrkar laipui-in Myanmar raltlante Biometric hmanga chhinchhiah tura thu thar a rawn neih leh chuan kalpui nghal mai ni se tiin an lo rel tawh bawk a ni.

Mizoram-ah Myanmar raltlan an tam lai khan mimal tin chanchin (Biographic Data) lak a lo ni tawh a, mi 35,011 te chu chhinchhiah niin mi 28,635-te chu Identity Card pek an lo ni tawh bawk. Kar kalta chhung khan Mizoram-a awm mek Myanmar raltlan zinga 12-te chuan an awmna Kolasib an chhuahsan ni a hriat a ni a, Myanmar-ah an kir leh nge Mizoram pawn hmun dangah an kal tih hriat chian a la ni lo. Heti hian tun dinhmun ah Mizoram-ah Myanmar raltlan 33,823 an awm mek a, an zinga 10,141 hi mipa niin mi 10,791 te chu hmeichhia an ni a, naupang 12,891 an awm bawk a ni.