Bairabi leh Sairang inkar-a Rel kawng siam mek Mizoram Lok Sabha MP in a hmunah a tlawh
Bairabi leh Sairang inkar-a Rel kawng siam mek chu nimin khan Mizoram Lok Sabha MP Richard Vanlalhmangaiha chuan tlawhin he hna thawh meka hmasawnna leh hnathawh tawh chin leh hmabak la awm te a enfiah.
Mizoram Lok Sabha MP hian Hortoki Railway Station-ah Officer te kawmin Rel kawng enkawltute chuan an hnathawh dan tlangpuite leh harsatna awm ang ang te MP hnenah hian an lo thlen a. Lok Sabha MP chuan Rel kawng in hma a sawn zia a taka hmuh chu lawmawm a tih thu sawiin, thawktu ten theihtawp an chhuahna zarah chak takin hma a sawn tih a sawi a. An harsatna te pawh a hnena thlen zel tur leh a tih theih ang chin chin ah theihtawp chhuahpui a inhuam thu a sawi bawk.Lok Sabha MP tawiawmtu Kolasib Bawrhsap Robert C. Lalhmangaiha chuan Rel kawng siam mekah hian District thuneihna atangin tih tur tul ang apiang tih fel sak nghal zel a nih tur thu leh harsatna an tawh lohna turin District Administration chuan theihtawp a chhuah ang tih a sawi a. Kolasib SP David H. Lalthangliana pawhin Rel kawng siamna hmanrua bo chungchang an chhuizui dan leh Police hmalak dan MP hi hrilhfiahin, investigation a an harsatna tawh te pawh a tarlang bawk a ni.
He hunah hian Deputy Chief Engineer (Contruction) Harjemal Meena chuan Mizoram Rel kawng dinhmun leh Rel kawng in hmasawnna a thlen tur bakah mipui ten an chhawr tangkai dan turte sawiin, khualzin phur tana a tangkaina tur chu hriat sa nimahse chutiang tho a pawimawh, bungraw hlawm lian chi phurhna atan te, thlai thar thawnchhuahna atan te leh thlai thar chhe hma chi te awlsam taka sawngbawlna hmun a thlenna atan a tangkai takzet dawn tih a sawi bawk.
Railway Consultant (Mizoram) Hrangtawna chuan zawhna chhangin hnathawktu turte hi Railway Recruitment Board (RRB) kaltlanga lak vek tur a ni dawn tih a sawi a, tualchhung mi lak theih tur chin awm ve mahse hna sang a nih dawn loh avangin Mizo thalai ten exam an hmachhawn a pawimawh thu a sawi a. Tunah hian Rel kal tir la ni lo mahse Kawnpui Station thleng Rel tlan thei tawh tura buatsaih fel a ni tawh tih sawiin, harsatna lian tham a awmlo a nih chuan Sairang thleng hian July 2025-ah zawhfel hman tum a nih thu a sawi bawk.
Tarlan tawh angin Bairabi Rel Station leh Sairang Rel Station inkar rel kawng thui zawng hi KM 51.38 niin Broad Gauge Railway Line a ni dawn a, Rel kawng siam zawh nan hian cheng vbc. 6547 vel seng tura ngaih niin Lei dawh lian (major bridge) 55 leh Lei dawh tenau (minor bridge) 87 a awm a, hmun 32-ah leiverh niin Leiverh (tunnel) thui ber sei/thui zawng chu KM 1.88 zet a ni bawk.
Comments
Post a Comment