Leiba vangin policy kalpui vut vut thei lo
Chief Minister Lalduhoma chuan leiba chinfel ngai a tam avangin an policy-te a kalpui nghal vut vut theih loh tih a sawi.
Mizoram State Policy Coordination Committee thutkhawm nimin a CM Conference Hall-a neih ah Chairman leh Chief Minister Lalduhoma chuan leiba chinfel ngai a tam avangin an policy-te a kalpui nghal vut vut theih a ni lo tih sawiin, “Kan leibate hi kan rul chho zel a, hma pawh kan sawn hle. Kumin hi inpuahchah kumah kan puang bawk a. Chuvang chuan kumin bikah hian Hand Holding Policy hi lian takin kan kalpui thei dawn lo a ni,” a ti a. “Kan sum dinhmun that dan azirin hmalakna hi kan nei lian chho zel dawn a ni,” a ti a, Chutihlaiin thlai thar lei tur pali an thlan tawh te erawh chu an lei ngei ngei thung dawn tih a sawi bawk a ni.Mizoram State Policy Coordination Committee thutkhawm ah hian Loan based progress partners, Zau Policy leh Line department-te inkaihhruaina (Guidelines) lam thilte sawiho a ni a, Member Secretary Lalmalsawma Pachuau chuan policy inkaihhruaina duan tlangpui leh tun Financial Year-a budget Hand Holding sum dah hmanchhuah dan tura duan te a sawifiah hnuah sawihona neih zui a ni. An thu ngaihtuah langsar te chu Loan hmanga Hand Holding kalpui turah Credit Guarantee Fund Scheme for MSME hmanga 100% loan guarantee - progress partners te pek theih dan leh buaipui chhoh mek a nih dan te, PMEGP, KCC leh loan danga interest subvention pek theih tur zat te, progress partners thlan te tana training dan tur te, Monitoring kalpui dan tur leh Hand Holding Policy Official Launching neih hmaa tihtur tul awm thei te a ni a. Zau Policy kalpui dan tur ruahmanna leh Hand Holding Policy-a Line Department te inbuatsaihna tur thil pawimawh te pawh sawiho a ni bawk.
Comments
Post a Comment