ASF in Serchhip District a luhchilh thuk mek zel
Serchhip-a AH&Vety Department hotute hnen atanga thu kan dawn danin nimin khan Serchhip District-a Veng leh khua 5-ah ASF avanga Vawk thi chhinchhiah belh awm lehin Vawk hri lenna hmuna la puan loh Serchhip Chanmari Veng-ah vawk thi 4 a awm a, Baktawng leh North Vanlaiphai-ah Vawk thi pathum ve ve awmin Chiahtlang leh Chhuanthar Tlangnuam-ah Vawk pakhat ve ve a thi leh bawk a, heng te nen hian Serchhip District chhunga Veng leh khua 16 ah kumin chhung hian ASF vanga Vawk thi 502 a awm ta a ni.
Nimin vek khan Serchhip District chhunga Veng leh khua 8-ah Vawk suat awm lehin Chhuan-thar Tlangnuam-ah 17, North Vanlaiphai-ah 13, Chhingchhip leh Thenzawl-ah 10 ve ve, Baktawng khua ah 8, Serchhip Hmar Veng-ah 7, Keitum-ah 4 leh Chhiahtlang-ah pakhat te suat an ni a. Heng te nen hian kumin chhungin ASF vang hian Vawk 2187 suat a ni tawh bawk a ni.
Serchhip District-a ASF hri leng mek hi kumin hian Serchhip District Hmar lamin an tuar na niin a lang a, Khumtung, Baktawng, Chhuan-thar Tlangnuam, Buhkangkawn, Chhingchhip leh Chhiahtlang bakah Hualtu leh Lungpho khua ah te Vawk thi awm tawhin Serchhip atanga chhim lamah Keitum, North Vanlaiphai leh Thenzawl-ah te Vawk thi a awm tawh bawk a. Serchhip bikah VC area 5-ah Vawk thi a awm tawh bawk a ni.