‘Project Intodelh inzirtirna’ atan Mizoram Samagra Shiksha leh Tharthilthlentu (TiLi) thawkdun dawn

Mizoram Samagra Shiksha leh Tharthilthlentu (TiLi) te chuan Pilot Project-a ‘Project Intodelh inzirtirna’ atan nimin khan thawhdunna an ziak.

Aizawl-a I&PR Auditorium-a thawhdunna ziahna hun hi School Education Minister Dr. Vanlalthlana chuan hmanpuiin ‘Project Intodelh inzirtirna’ hi School 10-ah neih a ni dawn tih sawiin, Kum 2008 atang daih tawha a lo vei tawh, Entrepreneurship in Education tih paper te hial a lo ziah tawh thu a sawi bawk. Minister chuan khawvel a danglam ruala insiamrem ve thei kan nih a ngai tih pawh sawiin, Zirlaiten nih tum hrang hrang an neih thin thu leh an nih tum an nih theih loh tawpah thil siamchhuah te, sumdawn te hi an hawi chauh thin tih a sawi a. Hei hian ngaihtuahna a ti thuiin, thlak danglam a ngaia a hriat thu a sawi bawk.

Mizoram chu intodelhna kawngah nasa lehzuala kan inzirtir a tul thu leh hei hi zirlai kan nih lai atanga tan a tul hle tih Minister chuan sawiin, he Project tihchhin tawhna kum 2 chhungah pawh a taka a lanchian thu a sawi. Nu leh pa te’n ‘Zirlai kan nih laiin lehkha kan zir that loh chuan hna i hmu lovang’ an tih thin chu thlak an tum tih a sawi a, “Hna hmu tur ni lova mahni intodelh tura zirlai te zirtir hi zirna in a tum a ni,” a ti a. “He project atang hi chuan Zirlai ten pawisa hlutna an hre lehzual dawn, nu leh pa te zahna thlengin he program hian a keng tel a ni,” a ti bawk.

Tharthilthlentu Chairman LTL Fela chuan ‘Project Intodelh Inzirtirna’ hi TEMC - TiLi Entrepreneurial Mindset Curriculum hnuaia framework mumal zawk nena duan chhoh anih dan a sawifiah a. Pilot project anih hma hian Dr. Vanlalthlana MLA fund hmanga uluk taka lo kalpui tawh anih thu a sawi bawk a. Hun hma lam a an lo kalpui tawh danah zirlaite chu Group-ah sem darhin sumfai Rs. 2000 theuh hmantir an ni a, a Course inzirtir chhung zawng hian Group anga thawk hovin Rs. 2000 chu an peipung ho a ni. TEMC hian a tum ber chu zirlaite mahni intodelh nih tir a ni a, thu ringawt nilova a taka tih ngai (practical) tam thei ang ber a kawng inkawhhmuh a ni.

Project Intodelh Inzirtirna atana thawhdunna turah hian Samagra Shiksha aiawhin Lalsangliana, SPD in hming a ziak a, TiLi aiawhin LTL Fela'n hming a ziak bawk a. He Intodelhna Inzirtirna Project hi School 10-ah kalpui tur niin chung te chu- Govt. KM High School, Govt. Central High School, Govt. KVM High School, Govt. JL High School, Govt. Hrangchhunga High School, Govt. Mizo Higher Secondary School, Govt. Chaltlang Higher Secondary School, Govt. Zemabawk Higher Secondary School, Govt. Republic Higher Secondary School leh Govt. MICE, Aizawl te an ni.