ZPM leh Congress in AMC-a rorel tlak ah MNF ngai lo

Aizawl Municipal Corporation (AMC)-a eptu Party, ZPM leh Congress Corporator te chuan MNF kaihhruai AMC chu mipuite chungah rorel tlakah an ngai lo tih thuthar thehdarhtute an kawmnaah an sawi.

Nimin khan Aizawl Press Club-ah AMC-a Congress leh ZPM Corporator te hian thuthar thehdarhtute kawmin MNF kaihhruai AMC chuan ruhrel rotling siam lamah hma thar lak an neih loh thu sawiin, kum 2023-24 AMC Budget pumpui atanga AMC in a thawhchhuah ve tur chu 10% bawr vel a nih thu leh 90% vel chu 15th Finance Commission atanga Urban Local Body Grant leh State sawrkar atanga Grant-in-aid lo kal a nih thu an sawi a. Hetiang anih lai hian hmasawnna tur hna liantham aiin thil te tham te te ah Pary mi leh sa in vulh nan an hmang niin an sawi a. Congress leh ZPM Corporator te chuan kum 2021-2024 chhunga MNF AMC kaihhruai sawrkar ah anmahni leh party mite invulh nana hna an pek chhuahzat sum chu Rs. 30,92,32,050 a tling niin an sawi. 

Opposition Corporator te chuan AMC atanga In sak, lei laih leh dawr hawn phalna License buaipui chhung a rei thin thu leh hei hian mi tam tak tan harsatna a thlen tih an sawi a, “A bikin In sa duhte tan lei laih phal loh hun chhung kumin ah August - October thleng a ni. Lei laih theih hun chhunga phalna hmu hman lo an awm fo thin. Mipuite tana zangkhai ngaihtuah ai chuan harsatna an siam duh zawk emawni tih mai tur a ni,” an ti bawk.

Hei bakah hian Tuirial-a Solid Waste Management Centre a bawlhlawh halralna khawl leina tur sum cheng nuai 274 hmuh atanga lei chu Darkar khata bawlhlawh Ton 10 halral thei tura ngaih a nih laiin a takah erawh Ton khat (1) pawh a halral theilo niin Party pahnih Corporator te chuan an sawi bawk a. “Tunah phei chuan hman lohin an dah leh ta ringawt a ni. Cheng vbc. 2 leh a chanve chuang zeta khawl hmantlak mumal lo lei a ni hi a lei dan phungah thil felhlel a awm ngei niin a lang. Aizawl mipuite chhawr tangkai tur a nih laia, a thar tirh atanga hman tlak loh khawl an lei hi sawifiah ngei turin kan phut a ni,” an ti bawk.

Property Tax hman dan chungchang ah pawh AMC Budget-ah Property Tax hmuh zat tur tarlan thin anih laiin a hmanna erawh tarlan a ni ngai lo niin an sawi a, Property Tax atanga Ward hrang hrang hmasawnna hna thawhna tur sum pawh Corporator ten an dawn kim ngai tawh loh thu an sawi a. Property Tax hman dan an tarlan danin, mipui chhiah pek khawm Property Tax Return hman dan tura ruahman chu Property Tax khawn khawmtu Local Council-te chanpual 5%; Office Administration atan 15% leh Corporator te kut-ah Ward chhunga hmasawnna hna thawhna tur atan 80% a nih thu an sawi bawk.