Police ten kumin ah Heroin kg. 38.651 zet an man tawh

Kumin kumtir January thla atanga May thla tawp thleng khan Mizoram Police-te chuan Heroin kg. 38 leh gram 651 an man tawh.

Mizoram Police-a IGP (Law and Order) Lalbiakthanga Khiangte sawi danin kumin-a thla 5 chhunga Police-te Heroin man hi tualchhunga an hralh danin cheng vbc. 11.59 chuang hu a ni a. Heroin tawlh manchhuah chungchangah hian Police-te chuan Mizoram hmun hrang hrangah thubuai 154 ziak lutin hemi a inhnamhnawiha puh mi 209 an man tawh a ni. Police-te hian thla 5 chhung vek hian Methamphetamine kg. 89 leh gram 445 an man a, Methamphetamine an man hi cheng vbc.11.62 hu nia chhut a ni bawk a. Methamphetamine bakah hian a mum-a siam ni ve lo Crystal Meth kg. 13 leh gram 49 an man bawk a. Crystal Meth hi a to hle niin an sawi a, an man hi cheng vbc. 40.47 hu zet niin an sawi a. Methamphetamine leh Crystal Meth kaihhnawihah hian thubuai 11 ziahluh a ni a, mi 17 man an ni bawk.

Mizoram Police ten an chhinchhiah chin ah nikum (2023) kha Mizorama Police-te’n kum khat chhunga Heroin an man tam ber kum a la ni a, nikum chhung khan heroin kg. 68 leh gram 055 an man a. A hun laia tualchhunga Heroin an hralhna rate-ah chuan cheng vbc. 20.41 hu zet a chhut a ni. Nikum chhung vek khan Methamphetamine kg. 154 leh gram 172 an man a, a hun lai rate angin cheng vbc. 20.4 hu a ni a. Crystal Meth pawh kg. 49 leh gram 5 an man a, hei hi a hun lai a tualchhunga an hralhna rate angin cheng vbc. 147.1 hu a ni. Nikum chhung vek khan Methamphetamine siamna atana an hman Pseudoephedrine kg. 210 leh gram 72 zet man a ni bawk.

Nikum chhung khan Heroin tawlhruk kaihhnawihah thubuai 232 ziahluh a ni a, mi 325 man an ni a. Methamphetamine tawlh chungchang ah thubuai 16 ziaklutin mi 25 man an ni bawk a. Crystal Meth chungchangah thubuai 6 ziaklutin mi 9 an man bawk a ni.