ZMC tihhmasawn zel dan tur CM hovin sawiho

Chief Minister Lalduhoma hovin nimin khan CM Conference Hall-ah Zoram Medical College (ZMC) tihhmasawn zel dan tur rel a ni.

He thutkhawm ah hian Chief Minister chuan tunhnaia ruah leh thlipui vanga ZMC in harsatna a tawk chu pawi a tih thu sawiin, engkim tluang taka a kal leh thuai theih nan theihtawp a lo chhuahpui thu leh tun thlenga a ngaihven zui reng thu a sawi a. ZMC thawktute pawhin, Disaster Management & Rehabilitation Department leh Department dangten ZMC harsatna tawh te chu an umzui tha hle tih Chief Minister hi an hrilh a ni. 

He thutkhawmah hian ZMC kalphung thil pawimawh te sawi niin, National Medical Council (NMC) endikna an hmachhawn mek dan te, Online Inspection leh CCTV Inspection a kal mek thute tarlan a ni a. ZMC behchhan Helipad leh Fire Station siam thuai chungchang te pawh an sawi a. ZMC hnathawktu, Society hnuaia lak te leh Mizoram sawrkar hnuaia lakte felfai zawka enkawl dan tur pawh sawiin, kum 2019-a a zirchiangtu Committee in report an lo siam tawh te sawilan a ni a. ZMC thawktute hi Mizoram sawrkar hnuaia lakluh vek thain an hria a. Council of Minister thuneihna a nih avangin Council of Ministers a ngaihtuah tura thlen ni se an ti a ni.

He thutkhawmah hian Health Minister Lalrinpuii leh ZMC hotute bakah Finance, DP&AR, Health & Family Welfare leh Law & Judicial hotute an tel a ni.