Mipui huapzo damlo enkawlna, ‘Universal Health Care’ Kalpui tur chungchang sawihona neih a ni

Mizoram Sawrkarin Mipui huapzo damlo enkawlna, ‘Universal Health Care’ kalpui a tum chungchangah nimin tlai khan Health Minister Lalrinpuii hovin Sawrkar lam thuneitute leh Non-Government Hospital Association, Mizoram (NGHAM) hruaitute chu an inkawm.

MHe inkawmna Secretariat Conference Hall-a neih ah hian Mizoram Health Care Society-a CEO Dr. Biakthansangi chuan Mipui Huapzo Health Care duan dan chungchang tlangpui sawifiahin, Mipuite tana man chawi lova damdawiin awm - Cashless a kalpui anih theihna tur atana Sawrkar inbuatsaih dan thlengin a sawifiah bawk a. Non-Government Hospital Association, Mizoram (NGHAM) President Lalrintluanga Jahau chuan Health Care kalpui dan tur leh Sawrkar in a sustain theih dan tur ruahmanna tha awm se a duh thu a sawi a,tunhma lama Health Care lo hlawhchham tawhna chungchangah Mizoram-a Private Hospitals te chuan sum tam tak an lo hloh tawh avangin hetiang a thlen nawn lohna tura ruahmanna tha awm thei se a duhthu a sawi a ni.

He inrawnkhawm hunah hia Adviser to CM (Finance) TBC. lalvenchunga leh Adviser to CM (Handholding) KC. Lalmalsawmzauva te chuan Health Minister hi an tawiawm a, Adviser to CM (Finance) chuan Package System kalpui dan turte, Premium hrang hrang siam tum anih thu te, Payment Mode leh Fund Flow chungchanga Sawrkar inbuatsaih dan te a sawifiah bakah Sawrkar ah rinna nghat ngam turin NGHAM hruaitute chu a ngen nghal bawk.

Adviser to CM (Handholding) KC. Lalmalsawmzauva pawhin mipui ten Sawrkar thara beiseina an neih san zia sawiin, System mumal tha neiin, hlawhtling taka Health Care kalpui anih theihna turin NGHAM te chu tanrual puiah a sawm bawk a ni.

He thutkhawm ah hian Health Minister Lalrinpuii chuan lawmthu sawiin, Mipui Huapzo Health Care hi a hlawhtlin ngei theihnan tanrual puiah NGHAM hruaitute chu a sawm a. Hemi hmalam hian Health Minister hian May 20, 2024 khan, “He Health Care Scheme-ah hian Cheng nuai 5 (nga) thleng pawisa pek ngai lovin Damdawi In-ah kan in enkawl thei dawn a ni,” tiin a lo sawi tawh bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar