CADC Chairman hlui leh a fapa bakah Deputy Chairman hlui te kum 4 tang tura tih an ni

Special Court (Prevention of Corruption) chuan dik lo taka mipui sum hman a nih chungchanga thiamloh a chantir Chakma Autonomous District Council (CADC) a Chairman hlui leh a fapa bakah Deputy Chairman hlui te chu kum li (4) chhung lung In tang tur leh cheng nuai thum chawi turin a hrem.

Special Judge Dr. HTC. Lalrinchhana chuan CADC Chairman hlui Kali Kumar Tongchangya, a fapa Julius Tongchangya leh CADC-a Deputy Chairman hlui Purna Muni Chakma te hi Zirtawpni khan eiruk thubuai-ah thiamloh a lo chantir tawh a. Hemi ni vek hian Jail-ah thawnin nimin khan hremna hi puan a ni a, heng mi 3-te hi IPC Section 409 leh Prevention of Corruption Act section 13 (2) leh 13 (a) & (b) bakah 120B IPC hmanga thiamloh chantir an ni a, Court chuan kum li (4) chhung lung In tang tur leh cheng nuai thum (3) chawi turin an chungthu hi a rel a, pawisa hi an pek loh chuan thla kua (9) dang an tan belh leh ang.

He thubuai hi April 9, 2019-a Bangalore-a hmunpui nei United Chakma Alliance (UCA) Vice President Udondi Chakma-a’n Mizoram Lokayukta-a a thu thehluh, mipui sum diklo taka hmanga Kali Kumar Tongchangya a puhna atanga lo intan a ni a. Lokayukta hian ACB hnenah pe-in kum 2021 atang khan chhui a ni. KK Tongchangya hi a fapa Julius Tongchangya, khatih lai a Doon (PG) College of Agriculture Science and Technology, Dehradun-a B.Sc. (Horticulture) a zir laia a PA atana la-ah puh a ni a. A taka thawk si lovin chawlh pe chungin hlawh a la reng a. Thawk hauh lova a hlawh lak hi a vaiin Rs. 17,35,183/- a ni.

Hei bakah hian Julius Tongchangya ta 'Julius Fish Seeds Production Center', Udalthana-I chu Sangha chi nuai 25 Supply order cheng nuai 50 man CADC in an pe a. Sangha chi hi nuai 17, cheng nuai 34 man supply si-in cheng nuai 50 hi pek vek niin Actual Payee Receipt-ah chuan tarlan a ni a. Hei chauh hi ni lovin leilet siamna atan Julius Tongchangya hi cheng nuai 1.6 contract pek a ni bawk a. Deputy Chairman hlui Purna Muni Chakma hi Julius Tongchangya hna a thuntu leh chawlh phalsaktu a ni a. KK Tongchangya hi ama fapa ngei sum tam taka hlawkna a neih theihna atana tha thawhtu a ni, tiin Court chuan thiamloh a chantir a ni.