Tuikum Bialtu MLA in YMA Day Chhingchhip-ah hmanpui

Tuikum Bialtu MLA leh Agriculture Minister PC. Vanlalruata chuan Inrinni khan Chhingchhip Joint YMA in YMA Day vawi 89-na lawmna hun Chhingchhip Community Hall-a an buatsaih chu khuallian niin a hmanpui.
Agriculture Minister chuan YMA Member kalkhawm te chu YMA Day Chibai bukin duhsakna a hlan a. YMA thil tum thenkhat te sawi zauin, hun awl hman that chu tunlai thalai ten kan zir thar a ngaih thu leh Mobile Phone kan hman nasat hian kan nunah nghawng thui tak a nei theih thu leh mimal nun leh khawtlang nun thlengah harsatna a thlen theih thu a sawi a, chuvangin mitin a hman dan kan enfiah a tul thu sawiin, Kristian nun dan tha ngaihsan leh, chu chu a taka nunpui chu YMA thil tum zinga mi anih anga ngaih pawimawh reng tur a nih thu a sawi bawk.

Tunlai ah thalai ten aia upate zahna an tlachham emaw tia sawi thin chu a vei thu pawh Minister chuan sawiin, “Hei hi kan hnam rohlu a ni a, kan inzirtir zel leh kan chawmnung zel a tul hle a ni,” a ti. YMA member te chu ruihlo taka fihlim tura chahin, ruihlo in min tibuai zel chuan kan chhungkua leh khawtlang nun bakah kan ram in a tuar zel dawn a, chuvangin ti lo turin in intiam a tul hle a ni, a ti a. Thalai, a bik takin mipa boral an tam chu a veiawm thu leh a ngaihtuahawm thu sawiin, hei kawng hrang hrang kan in enlet a pawimawh a, kan vei tlan a tul a ni, a ti bawk.

Chhingchhip Joint YMA in YMA Day an lawmna hun hi Joint YMA Treasurer C. Lalchhuanmawia chuan kaihruai a, hnam lam leh lemchan entir niin khawtlang hruaitute bakah mi hlun hrang hrang atangin thusawite ngaihthlak a ni. Joint YMA Chhingchhip hnuaiah hian Branch 3 awmin, member 2444 an awm mek a. Minister hian YMA Day lawm nan Joint YMA hruaitute chu Silpauline bundle khat a hlan bakah hun hmangtu YMA Chhang Branch pathum te chu Rs. 1000 theuh a hlan bawk.

Mizorama tlawmngai pawl lian ber leh huapzau ber - YMA hi June ni 15, 1935 khan Young Lushai Association hming pu in din a ni a. Kum 1947-ah a hming hi ‘Young Mizo Association’ tia thlak a ni. Tunah hian Central YMA hnuaia Branch 821 a awm a, heng zinga Branch 54 te chu Mizoram pawn Branch din te niin Member mi 4,90,601 an awm mek a, chung zinga mi 2,03,743 te chu hmeichhia an ni.

Kum 1986 leh 1993-ah te ramngaw humhalh kawngah hmalakna tha a neih leh a thawhhlawk avangin India ram pum huapa Environment Award hlun tak Indira Gandhi Pariyavaran Puraskar chu YMA in alo dawng tawh a. Ruihlo dona kawngah thawh that avangin NGO bika hmalatu tha ber chawimawina National Award for Outstanding Service in the field of Prevention of Alcoholism and Substance (Drug) Abuse chu kum 2013 khan an dawng tawh bawk a ni.