PWD Minister in Chhiahtlang-ah YMA Day hmanpui

YMA Day vawi 89-na chu Inrinni khan Chhiahtlang-a YMA Branch hrang hrang panga (5) te chuan a huho in an hmang a, he hun hi PWD Minister Vanlalhlana chuan khuallian niin a hmanpui a ni.
Chhiahtlang YMA Co-ordination Committee bultuma Ramlai Community Hall-a YMA Day hmanna ah hian PWD Minister chuan YMA chu mitin huapzo; Kohhran, Politics leh pawl awn bik nei lo; Kristian nun dan tha chawisang a, khawtlang nun khalh ngiltu; tanpui ngai te tanpuia, pachhiate dawmkangtu pawl ropui a nih thu a sawi a. Chhiatni thatni ah YMA an tangkai em em tih sawiin, rikrum thil a lo thlen pawhin Sawrkar tha ti chaktu an nih thu leh Cyclone Remal in Mizoram chhunga chhiatna nasa tak a thlen lai pawh khan YMA te an tangkai em em tih a sawi a. Hmalam pan zel tur kan nih angin YMA Day ah hian nakin lawka kan ram hruaitu tur thalaite hnenah chakna leh beiseina kan pek a ngai, tiin kalkhawmte a fuih bawk.

PWD Minister chuan kum 25 liamta ah khan Lungpho bial a nih laiin Chhiahtlang chu MLA anga a bial a nih thin thu sawiin, Vawiin thlengin Chhiahtlang khua chu a ngainain, a thinlungah an lian reng tih a sawi a. Chhiahtlang khaw pum YMA Branch intelkhawmin YMA Day ropui taka an lawmna ni pawimawh takah khualliana an sawm chu lawmawm a tih thu sawiin, YMA Co-ordination Committee hnenah Rs. 20,000 a hlan bawk.

Chhiahtlang-ah hian YMA Branch panga - Kawn Veng, Zotuithiang, Hmar Veng, Chanmari leh Chhim Veng Branch YMA te awmin YMA Co-ordination Committee-ah inchhungkhawmin hmalakna pawimawh tak tak an neih zingah NH-54 kawngpui zauh chungchanga sawrkar leh Company dawr te, ramngaw humhalh kawnga an hmalakna te, chhiatni thatni leh rikrum thila pheikhai ruala khaw pumin ke an pen theihna tura tanlak te a tel a. YMA Branch pangate khaikhawm tur leh khawtlang huapa YMA anga hmalak tul thila hma la tura din a ni.