Serchhip khawpui chhunga YMA Branch ten YMA Day vawi 89-na ropui takin an lawm

Mizoram-a tlawmngai pawl lian ber Young Mizo Association (YMA) chuan Inrinni kalta, June 15, 2024 khan YMA Day vawi 89-na chu hmun hrang hrangah an lawm a, Serchhip-ah pawh YMA Branch hrang hrang ten an remchan angin YMA Day hi an lawm a ni.
Kumin a YMA Day hi Chhiahtlang-a YMA Branch panga te chuan Ramlai Community Hall-ah a huho-a hmangin New Serchhip-a YMA Branch 4 te pawhin kumin hian a huho in an hmang bawk a, Zirtawpni zan khan New Serchhip YMA Hall-ah thalaite infuihtharna hun hmangin Inrinni khan nileng-a intihhlimna neiin New Serchhip Futsal Ground-ah hun an hmang bawk. Serchhip Vengchung Branch te pawhin Zirtawpni zan khan Zoluti Hall-ah Member te infuihtharna neiin Inrinni khan hnatlang an nei bawk.


Serchhip Dinthar Branch YMA chuan YMA Day-ah hian Thlanmual samfai hnatlang neiin Serchhip Field Veng Branch YMA te pawhin vengchhung thenfai hnatlang an nei bawk a, Saron Branch YMA chuan vengchhung thenfai hnatlang neiin zirlai tithate chawimawina hun an hmang bawk a. Serchhip Kawnpui North Branch te chuan an huamchhunga luikawr awm te thenfai hnatlang an neih bakah an huamchhung kawngpui dung thenfai hnatlang an nei bawk a, Serchhip Kawnpui South Branch YMA te pawhin zingkar-ah vengchhung thenfai hnatlang neiin zirlai tithate chawimawina hun an hmang bawk.

Serchhip Chanmari Branch YMA te chuan YMA Day-ah hian Zotawna Futsal Ground-ah nileng-a hun hmangin intihhlimna chi hrang hrang hmangin Section YMA ten inelna an nei a, Serchhip Darnam Branch YMA chuan zingkar ah hnatlang an nei bawk. Serchhip P&E Veng Branch YMA te chuan District Park-ah hun hmangin Kumpuan thuchah ngaihthlak a nih bakah nileng-a intihhlimna neiin ruai nen YMA Day hi an lawm a, Serchhip Hmar Veng Branch YMA te chuan Serchhip Sports Complex-ah hun hmangin thusawi hrang te ngaihthlak a nih bakah intihhlimna neiin ruai nen hun an hmang a. Serchhip Chhim Veng Branch YMA chuan zingkar-ah Thlanmual samfai hnatlang neiin chhun lamah Chhim Veng Volleyball Court-ah intihhlimna neiin hun an hmang bawk.

Serchhip Sub-Hqrs. YMA chuan kumin-a YMA Day pual hian Serchhip District Hospital Poor Fund leh Mercy Hospital Poor Fund bakah Serchhip District Jail, Unity Orphanage Home, Zoar Deprived Children Home, Old Age Home, Adult Rehabilitation Centre (ARC) Chhiahtlang leh Shalom Special School Serchhip-ah te thilpek an hlan a, Keitum Branch YMA leh Bungtlang Vengsang Branch ten an sawm angin Sub-Hqrs. YMA Serchhip-a hruaitute chuan heng Branch-ah te hian YMA Day hi an hmanpui bawk a ni.

Comments

Popular News (Last 30 Days)

Serchhip DCSO sawn a ni