Serchhip-ah Vaihlo leh a kaihhnawih thatloh zia inzirtirna ni 'World No Tobacco Day' hman a ni
.jpeg)
National Tobacco Control Programme (NTCP) Serchhip District leh Women and Child Development Department tangkawp buatsaiha Govt. H/S Serchhip-a 'World No Tobacco Day' puala hun hman hi NTCP Serchhip District Nodal Officer Dr. Lallawmkimi Chhakchhuak chuan hmanpuiin kumin a World No Tobacco Day-ah hian naupangte vaihlo leh a kaihhnawih atanga venhim chu thupui atan hman a nih thu leh India ramah kum 2003-a COTPA siam a nih khan kum 18 hnuailam te hnena Vaihlo leh a kaihhnawih hralh leh zawrh tir te chu khap a ni tih sawiin, zirna In atanga yard 100 huamchhung ah pawh hetiang thil hi zawrh phal a nih loh thu leh Dan bawhchhiate chu hremna pek theih an nih thu a sawi a. Mizote hian zuk leh hmuam leh vaihlo te hi kan ngaihmawh tawk lo tih sawiin, nu leh pa tam tak ten kan tu leh fate zuk leh hmuam lei tura kan tir mai thin te chu naupang ten zuk leh hmuam tih pawisak lohna an neih phah thin tih a sawi a. Hei vang hian nu leh pa te pawhin tu leh fa te entawn tura zuk leh hmuam, vaihlo kaihhnawih laka kan fihlim a pawimawh thu a sawi bawk.
Serchhip-a World No Tobacco Day puala hun hman hi NTCP Serchhip District-a DEO Lalramnghaka Kawlni chuan kaihruaiin Women and Child Development Development, Serchhip District-a District Mission Coordinator, District Hub for Empowerment of Women, Lalvensanga chuan an hmalakna te sawiin, Mizote hian zuk leh hmuam kan tih nasat thu leh hei hian kawng tam takah min ti hnufual tih a sawi a. Ruihhlo leh zuk leh hmuam a fihlim lo tan rampawn lamah phei chuan hna hmuh a harsat thin thu sawiin, kan ramchhung ah hnathawh tur a van zel avang leh rampawn thlenga hna zawn kan mamawh avangin zuk leh hmuam laka fihlim chu zirlaite leh thalaite tan thil pawimawh hmasa a nih thu a sawi bawk.
He hunah hian NTCP-a District Consultant K. Hmingthansangi chuan kumin a he ni thupui hmang hian zirlaite hnenah a lem nen entirin zirtirna a pe a, Maria VL. Neihhlui, Counsellor, NTCP kaihhruaina in zuk leh hmuam laka fihlim tura intiamkamna (pledge) sawi rual a ni bawk.
Serchhip-a 'World No Tobacco Day' hmanna ah hian NTCP leh HIMNA MADAT in Serchhip District chhunga Middle School leh High School zirlai te tan ‘Zuk leh hmuam, ruihhlo laka naupang venhim’ tih thupui hmanga Drawing/Painting Competition an buatsaiha tithate hnenah lawmman sem a ni bawk a. Middle School Section-ah Vanlalhlimpuii, Little Flower Convent School chu pakhatna niin B. Lalhriatzuali, Chawng-buangin Memorial Elementary School chu pahnihna leh C. Vanlalchhuangzuala, Little Flower Convent School chu pathumna an ni a. High School Section-ah Zodinpuii chu pakhatna niin Sarah Lalbiakdiki chu pahnihna leh Vanlalchhanchhuahi chu pathumna an ni a, an vai hian Goodwill English Academy-a zirlaite vek an ni a, heng Category pahnih ah hian zirlai 3 ve ve te hnenah Consolation Prize siam a ni bawk.
Comments
Post a Comment