MPCC in ZPM sawrkar an mawhpuh; ZPM in Mizoram sawrkar mawhphurh a ni lo tih an sawi

Mizoram Pradesh Congress Committee chuan Mizoram Police mi 1047 ten Vote an thlak loh chungchangah a mawhphurtu bul ber chu ZPM sawrkar niin an sawi a, ZPM Party chuan Mizoram Sawrkar mawhphurhna a ni lo tih an sawi thung.

Inrinni-a Aizawl Press Club-a thuthar thehdarhtute an kawmna ah MPCC Legal Department Chairman TT. Zothansanga chuan, “Election duty tura Mizoram pawna thawnchhuah kan Police 1,047 laiin vote an thlak ve thei dawn lo a ni tih kan hriat veleh Chief Electoral Officer, Mizoram hnenah lehkha ziakin kan Police-ten vote an thlak ve ngei theih nana hma la vat turin kan ngen a. Amaherawh chu, Election Commission of India-in Rule 18A of Conduct of Election Rules ang baka Special Arrangement siam a rem tih loh avanga kan Police-ten vote an thlak nana hma an lak theih loh thu chhanna kan hmuh avangin kan lung a awi lo hle a ni,” a ti a. Police vote thlak theih loh thu-ah hian Gauhati High Court-ah an kal tih sawiin, vanduaithlak takin High Court-in an ngenna te a tihhlawhtlinsak thei lo niin a sawi a. All Party-in Police-ten Vote an neih nana lehkha an thehluhah Ruling party ber an tel lo chu mak an tih thu a sawi bawk.

Hetihlai hian ZPM party chuan Inrinni khan Press Statement siamin Inthlanna a Duty Mizoram Police mi 1047 lai ten Vote an thlak lo chu pawi an tih thu leh heng Police te hian Vote an thlak ngei theih nan Mizoram sawrkar chuan hma a lak thu sawiin, Election Commission of India-ah lehkha thawnin, vote thlaktir ngei tura ngenna te a siam thu an sawi a. March 16, 2024-ah Mizoram-a MP inthlanna neih tur puan a nih thu leh inthlan puan a nih tawh chuan Model Code of Conduct puan a nih nghal thin avangin Central lam thu thu-a awmin State Sawrkar-in thuneihna a nei tawh lo tih an sawi a. State danga duty tura ruat Mizoram Police te kha March 28 leh 29-ah Bairabi Rel Station atanga chhuak tura tih an nih thu leh New Delhi atangin an chuanna tur Rel hi a bika rawn tirh niin tih khawtlai theih a ni lo tih sawiin, “Nomination inhnuhdawh theih ni hnuhnung ber kha March 30, 2024 a ni a. Ballot Paper siam hmain Mizoram an chhuahsan hman a ngai tlat a nih chu,” an ti a. He thil hi Mizoram sawrkar mawhphurhna a nih loh thu leh ECI ruahmanna in duhthu a sam zo lo a nih zawk thu an sawi a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar