SEDP Zirtirtu aia tam sawrkar in lak a tum

MNF sawrkar liamta in a lak, SEDP sum hmanga Education Department hnuaia Zirtirtu bakah LDC leh IV Grade te chu an hun tawpin Inrinni atang khan an chawl ta a. SEDP Zirtirtu aia tam Zirtirtu lak an nih tur thu School Education Minister Dr. Vanlalthlana’n a sawi.

Minister Dr. Vanlalthlana chuan tun dinhmunah SEDP Teacher-te chu anmahni thlaktu tur lak fel la ni chiah lo mah se June ni 1, 2024 atang khan an chawl dawn tih a sawi a. Thla hmasa May ni 29 khan Zirtirtu thar la tur hian Exam buatsaih tawh niin, a tlingte erawh Election Model Code of Conduct (MCC) a zawh hunah puan a ni ang, a ti. Education Minister sawi dan chuan SEDP Teacher chawl turte hi mi 1,100 vel an ni a, hetihlai hian Zirtirtu lak thar tur hi mi 1,400 vel an ni dawn thung a. Zirtirtu ngai chhawr nawn ni dawn lo mah se zirna kawngah harsatna a awm dawn lo niin a sawi bawk. School Education Minister sawi dan chuan, SEDP hnuaia LDC leh IV Grade te pawh chawlhtir an ni ve dawn tho a, mahse Finance Department lamin an aiawh tur lak a la remtih loh avangin mi thar lak an ni dawn rih lo thung.

Mizoram sawrkar chuan SEDP Zirtirtu thlakna tur nia ngaihin Zirtirtute hi a nghet lovin a la dawn a, kumin March ni 15 khan Advertisement a ti chhuak tawh a, Casual Teacher hi High School atan mi 350, Middle School atan mi 371 leh Primary School atan mi 694, a vaiin mi 1,415 lak tum a ni.