Chak zawka ruihhlo do turin sawrkar in tan a la dawn

Chief Minister Lalduhoma chuan chak zawka ruihhlo do a nih theih nan sawrkar in tan a la dawn tih a sawi.

Mizoram Police buatsaihin Inrinni zing khan Aizawl Chanmari atanga Lammual thleng ruihhlo do kawngzawh, ‘Drugs Free Mizoram Walk 2024’ neih a ni a. Kawngzawh kharna inkhawm Lammual-a neihah Chief Minister Lalduhoma chuan ruihhlo in thalaite a suat nasa tih sawiin, “Ruihhlo hian thalai, a bikin mipa min suat nasa hle a. Khawvela damrei lo ber hnam kan ni a, hetiang zela kan kal chuan nakin lawkah chuan mipa leh hmeichhe inbuk tawk lo kan ni thuai dawn a, fahrah leh hmeithai an tam ang a, nula ten pasal neih tur an hmu dawn lo a ni,” a ti a. Chak zawka ruihhlo do kalpui a nih theih nan hun engemaw chen lo thukhawm tawh ngai lo, Ruihhlo Do Core Committee pawh an tuai thar tih sawiin, “Supply lam tih tlem hna hi Excise & Narcotics Department lam mawhphurhnaah dahin demand tihtlem lam hi Social Welfare kutah kan dah a, fel takin hmalak dan tur kan thliar a. Central YMA kutah kan innghat thuk hle a ni,” a ti bawk.

Chief Minister chuan Drugs do kawng ah sawrkarin theihtawp a chhuah dawn tih sawiin, “Drugs dona atan hian sum leh pai kan ui dawn lo va, dan pawh siam that kan tum mek a. Kan society mualphona thlentu tibo turin theihtawp chhuah ang u,” tiin kalkhawmte a sawm a. Covid inkhuahkhirhna nasa tak kalpui a nih laiin ruihhlo a tlem hle a, a ngawlvei ni a hriatte’n an lo nghei thei hle tih hriat a ni tih sawiin, ruihhlo chu Mizoram-ah tih tlem hrim hrim leh zalen tir loh chu an duh ber a nih thu leh sawrkar hmalakna chu mitinin thlawp turin a ngen tih a sawi bawk.

He hunah hian Home Minister K. Sapdanga pawhin Drugs avangin Mizo thalaiten nun an chân nasa tih sawiin, “Namen lova kan do a nga,” a ti a. “Drugs hmanga sumdawng leh buaipuitute hi mi tam an ni lova, a nghawng erawh a nasa a. Tangruala kan do chuan a rem loh pawhin a ziaawm thei a ni,” a ti. 

Excise & Narcotics Minister Lalnghinglova Hmar pawhin, “Ruihhlo do kawngah hian sawrkarin a malin thil a ti thei lo a. Tlawmngai pawl, kohhran leh kan zavaia kan do chuan a ziaawm thei a ni,” a ti bawk.

Drugs Free Walk kharna inkhawm hi Mizoram DGP Anil Shukla IPS chuan kaihruaiin Lalbiakthanga Khiangte IGP chuan lawmthu sawiin inkhawm a khar a. Assembly Speaker Lalbiakzama bakah Minister pahnih C. Lalsawivunga leh Lalrinpuii te, Adviser to Chief Minister, MLA leh sawrkar mi pawimawh dang te an tel a. School 15 telin Tlawmngai pawl hrang hrang 5 leh Assam Rifles, CRPF leh BSF te an tel bawk a. Lammual-a hun hmannaah hian kalkhawmte chuan thutiam (pledge) sawi rualin ‘Ruihhlo do turin ka theihtawp ka chhuah zel ang’ tiin an intiam a ni.