Raltlan la rawn luh belh zel

Bangladesh, Chittagong Hills Tract-a tlangmi te’n thuneihna sang zawk an ngiat avanga Bang-ladesh sipai leh Kuki-Chin National Army te tharum hmanga inbeihna nghawng kal zelah kar kalta Zirtawpni khan Bangladesh atangin sahimna zawnga tlanchhia mi 163 te’n Lawngtlai District-a Chamdur ‘P’ an lut a, tun tuma raltlan rawn lutte hi puitling mipa 57 leh hmeichhia 48 bakah mipa naupang 29 leh hmeichhe naupang 29, an vaiin mi 163 an ni a; chhungkaw 41 an ni. Sahimna zawnga Lawngtlai District a lutte hi Zirtawpni chawhnu dar 2:00 vel khan Lawngtlai District-a Mautlang khuaah lutin, Chamdur ‘P’ khawtlang hruaitute’n Chamdur ‘P’-ah lirtheiin an hruai a, a theih ang angin an eitur leh riahna tur te an buaipui a ni. Chamdur ‘P’ ah hian Bawm raltlan chhungkua 74-a mi 291 an awm mek a, Sawrkar chuan thil awmdan a theih ang anga vilin a en chiang mek niin District thuneitute chuan an sawi.