School Education Department-a la thleng ngai lo thil thar kan hmuh chhoh zel Minister in a beisei

School Education Minister Dr. Vanlalthlana chuan School Education Department-a la thleng ngai lo thil thar kan hmuh chhoh zel a beisei thu a sawi.

Mizoram Government School Teachers' Union (MIGOSTU) in niminpiah-a Aizawl Chanmari YMA Hall-a Special Conference an neih a hmanpuina ah Education Minister Dr. Vanlthlana chuan sawrkarin zirna a ngaih pawimawhzia leh tan lak nasat a tumzia a sawi langin, School Education Department-a la thleng ngai lo thil thar pawh kan hmuh chhoh zel a beisei thu a sawi a. Sawrkar chuan an puala sum hman tur pawh Budget-ah a dah thu sawiin, chak taka hmalak zel a tum thu a sawi bawk a. Tunhnaia School provincialised thara zirtirtu lo kalkhawm MIGOSTU member-te mamawh chu tihlawhtling turin sawrkarin theihtawp a chhuah thu a sawi bawk.

Minister chuan zirtirtute chuan an zirlaite taima tak leh puitling ngei tura zirtir turin a chah a, Mi dangte tana thil tha titu nih chuan nakin ah mahni vek chungah thil tha a rawn let thin a, zirlaite hmangaih leh duhsak taka zirtir thin turin zirtirtu kalkhawmte chu a fuih bawk a ni. Minister chuan zirtirtu kal khawmte chu zirlai naupangte yllabus an zirtir piah lamah zirlai laktlak, mi puitling, mahni kea ding theia chherchhuak tur leh nunphung tha leh system dik, Life Skills hrang hrang leh environment humhalh pawimawhzia te zirtir uar thin turin a chah bawk a. Chumi tihhlawhtlinna kawng khat atan 'Intodelh zirtirna' pawh High school-ah kalpui a nih thuai a beisei thu a tarlang bawk.