Aizawl Civil Hospital-a nau neihna hmunhma thuam thar Chief Minister in a hawng

Aizawl Civil Hospital-a nau neihna hmunhma (Labour Room leh Maternity Ward) te Rogi Kalyan Samiti (RKS) sum cheng nuai 95.40 senga thuam thar chu nimin khan Chief Minister Lalduhoma chuan a hawng.

Hemi puala Inkhawm neih ah Chief Minister Lalduhoma chuan Infant Mortality Rate (IMR) chu ram hmasawnna thlen chin min hrilhtu pawimawh a ni tih sawiin, UN pawhin Millenium Development Goals-ah khan IMR hi tehna pawimawh zingah a telh thu leh IMR hniam ram chu ram him, chenna atana ram ralmuanga ngaih a ni tih a sawi a. IMR tha kan neih theih nan sawrkar laipui chuan nu, nau hring tur zawng zawng te chu damdawi In emaw, Sub-Centre ah ngei nau nei thin turin a duh thu leh hmalakna pawh a kalpui nasa tih a sawi a, chutianga ti te chu nau neih lawmman te a pe hial thin thu a sawi bawk. Chief Minsiter chuan Naupiang hlim thihna te, nu nau chunga boral an tlem deuh deuh theih nana damdawi In-ah ngei nau hring tura kan inzirtir rual hian kan damdawi In leh kan nau neihna hmunhma te kan lo thuam that ve zel a ngai bawk tih sawiin, “Aizawl mipui tana pan awlsam leh lun, Civil Hospital-a kan nau neihna hmunhma te tihchangtlun a ni hi a lawmawm hle,” a ti a. Health Minister leh a thawhpuite, RKS Governing Body chungah te lawmthu a sawi bawk.

Chief Minister chuan Doctor leh Medical lama thawktute chu rawngbawlna pawimawh tak chelhtu an nih avangin an thiamna bakah an tawngkam leh chetzia thlenga damlote tana thlamuanpui tham a tling thin tih a sawi a. “A pantu apiangten lawm taka an chhuahsan zel theih nana theihtawp lo chhuah thin ang che u,” tiin a ngen bawk.

Tun tuma Labour Room leh Maternity Ward thuamthat ah hian High Dependency Unit tihlen leh tihchangtlun niin State of the Art Labour and delivery Room te, Infection control tha zawk siam te, Patient privacy and comfort tihchangtlun hna te, Toilet block Unit 7 siam belh leh Post natal and Ante Natal Wards thar leh zau zawk siam bakah Doctors and staff te hmanrua tihchangtlun hna te thawh a ni a. Dr. Catherine Ngurbiakveli, Head of Department, Obs & Gynea chuan an hmalak dan tlangpui sawifiahin, thlatin an nau neihna hmunah hian nau 320 an chhar ziah anga chhut a nih thu leh anmahni pantu tumah damdawi In danga kal turin an tir ngai lo tih a sawi a. Tuna an nau neihna hmunhma tihchangtlunna bultumtu Aizawl DC leh RKS Governing Chairman Nazuk Kumar IAS chungah lawmthu a sawi bawk.

Aizawl Civil Hospital-a nau neihna hmunhma tih changtlun hawnna hun hi Sr. Medical Superintendent Dr. ST. Lalruatfela chuan kaihruaiin RKS Governing Body Chairman Nazuk Kumar IAS pawhin Maternity Ward leh Labour Room an thuam thar chu a lawm thu leh he hmuna hnathawktute thawmrimzia leh taihmakzia hi a mit ngeiin a hmuh thu a sawi a, Hmunhma tha zawk leh hmanraw changtlung zawk an mamawh hle tih te a hriatpui thu te a sawi bawk.