Mizoram-ah NECTAR Liaison Office hawn a ni

North East Centre for Technology Application and Reach (NECTAR) Mizoram Liaison Office chu nimin khan Aizawl-a Directorate of Science and Technology Building-ah hawn a ni.

NECTAR Mizoram Liaison Office hi Planning and Programme Implementation Department a Commissioner & Secretary Vanlaldina Fanai chuan a hawng a, North East Centre for Technology Application and Reach (NECTAR) hi India hmarchhaka Science leh Technology hmasawnna buaipuitu leh mipuiten hetiang lam thiamna an chhawr tangkai theih nana hmalatu bulpui ber a ni a. Kum 2012 khan India sawrkara Department of Science and Technology hnuaiah din a ni a, an Headquarters hi Shillong-ah a awm a ni.

NECTAR hian hmarchhak State hrang hrangah project engemaw zat an kalpui mek a, Mizoram-ah pawh project 14 kalpui niin chung zinga project pathum – Khawzawl District-a lo neitute tana ni chakna ring Cold Storage bun te, Mizo puan design lama hmalakna leh Thenzawl-a Techno-Preneurship tihhmasawnna tur project te zawhfel ni tawhin nimin khan an thil siamchhuah te phochhuah a ni bawk.