Sawrkar in Temporary Relief Camp a siam dawn

Chief Minister Lalduhoma chuan nimin khan a Pisa-ah Hlimen leh Melthum leimin tuar leh hmun him lova awm insawnchhuah lailawk ngai aiawh te kawmin Bialtu MLA Baryl Vanneihsang Tlau chuan a tawiawm a. Heng hmun him lova cheng, insawn lailawk ngaite hi School building leh hmun remchangah an invawm lut hlawm a. Zirna hi a pangngai-a a kal chhoh leh tawh dawn avang te, AMC By-Election neih huna Polling Station a hman tur te a nih hlawm avangin Relief Camp ngaihtuah tan tul an tih thu Chief Minister hnenah hian an thlen a ni.

Chief Minister chuan Transport Department rama Temporary Relief Camp a rang lama sak a nih tur thu leh chu hmunah chuan nakum January thla thlenga an chen lailawk theih tur thu amah kawmtute hi a lo hrilh a. DM&R lamin Camp sakna tur sum pawh an kawl reng tawh tih sawiin, hna an tan nghal mai tur thu a lo hrilh a. Chhungkaw insawn ngai zawng zawng te chu buhfai bag khat theuh a pek ve tur thu pawh a lo hrilh a ni. Leimin tuartute sawi danin chenna In 46 a khawsa chhungkaw 69 vel te hmun him lam panin an inthiarchhuak a ni.