Sangha-a intodelh turin hmalakna tur a la tam tih sawi

Fisheries Minister Lalthansanga chuan Mizoram in Sangha a intodelhna atan hmalakna tur tam tak ala neih thu leh sawrkar laipui pawhin hemi kawnga sum ruahman te a tipung chho mek tih a sawi.

Mizoram Cooperative Fish Farming Marketing and Processing Federation Ltd. (ZOFISFED) General Assembly vawi 20-na nimin-a I&PR Auditorium-a neih a hmanpuina ah Fisheries Minister Lalthansanga chuan kum 30 zet Sangha khawitute tan ZOFISFED in Department nen thawkho a kuthnathawktute dinhmun chawisanna lama an hnathawh chu chhuanawm a tih thu sawiin, an kalzelna turah tha nia a hriat te a sawi a. Mizoram in Sangha tharchhuah kawnga leh hemi a intodelhna atan hmalakna tur tam tak ala awm thu te sawiin, Central Sawrkar chuan hemi lamah te pawh an sum ruahman te a tipung chho mek a, hengte hi kan tangkaipui ngei thein nan a lo dawnsawn dana kan inpuahchah a ngai tih a sawi a ni.

Sawrkar thar programme - Handholding Programme (Policy) chungchang pawh sawiin Minister chuan, he ruahmanna hnuaia sawrkarin a thawhpui turte leh a puih turte chu beneficiaries te ti tawh lovin Progressive leh Business Partner an ti tawh tih a sawi a, “Heng kan thlanna kawngah chuan politics induhsakna a awm thiang dawn lova, a hlawhtlin pui ngei turte chu induhsakna awm lovin Free leh Fair tawkin thlan a ni dawn a ni,” a ti. Sawrkar thar chuan project reng reng chu nakin zela a hmantlak dawn em, a hman zui thei dawn em, Sawrkar tan phurrit a ni thei em tih te chu a ngaihpawimawh ber tur a nih thu sawiin, Project reng reng chu Planning Department a kaltlanga a ngai dawn a, chutiang turin project siamtu leh buaipuitute pawhin an ngaihtuahna an herrem a tul thu a sawi bawk.