PIGFED Annual General Meeting Minister in hmanpui

Mizoram Pig Producers’ Cooperative Federation Ltd. (PIGFED) chuan nimin khan Aizawl Chanmari YMA Hall-ah Annual General Meeting vawi 29-na hmangin Cooperation Minister PC. Vanlalruata chuan a hmanpui a ni.

PIGFED Annual General Body Meeting-ah hian Minister PC. Vanlalruata chuan Mizoram-ah Society Movement hun rei tak alo thuanawp tawh hnuah, tuaithar a nih theihna tura harsatna hrang hrang kara Society-te hmalakna kal zel a hmuh avangin lawmthu a sawi a; Sawrkar pawhin Society-te pawimawhna hriain, chak zawka an hmalakna te kalpui a nih theihna turin tanpui a tum thu a sawi a. Cooperative Society hnuaia farmer-te khaichhuah an nih theihna turin sawrkarin hma a lak mek thu sawiin, intodelhna tura PIGFED Ltd. in project a neih ah te sawrkarin a tanpui tur thu a sawi bawk.

Cooperation Minister chuan Mizo Hnam leh Vawkvulh chu inzawm tlat a nih avangin vawksa leh vawk chaw-ah kan intodelh a tul thu a sawi a, Vawk chaw a intodelh turin Feed Processing Unit din belh a pawimawh thu leh thingtlang lama Feed Processing Unit din belh chu thingtlang mite tan Cost of Transportation tihtlem theihna pawimawh a nih thu a sawi bawk a. PIGFED Ltd. chu Modern Meat Shop leh Ranchaw zawrhna Sales Outlet tam zawk hawng thei tura hmala turin a fuih bawk.

He hunah hian AH&Vety Department-a Addl. Director Dr. R. Malsawma chuan PIGFED Ltd. leh AH&Vety Department chuan thawhhona tha neiin, Vety Department thlazar hnuaiah Office hmun te luah tirin, Animal Feed Plant, Tanhril hmuna Sales & Marketing hna te leh Vawk kahrai (Artificial Insemination) hna te chu PIGFED Ltd. kutah a dah mek tih a sawi a. Cooperative Societies, Mizoram-a Registrar, R. Lalremsanga pawhin Primary Society te chu Business Oriented Society an ni tih hre reng turin a fuih bawk.

PIGFED Ltd. Annual Report tarlan danin, kum 2023-2024 chhungin Artificial Insemination Technology hmanga vawk kah rai atangin Vawk note 41,299 an piang a, a hlut zawng hi Rs. 28,90,93,000 a chhut a ni. An hnuaiah Affliated Primary Society 164 lai an awm mek bawk a ni.