Sairang-a FCI Kudam sak mek zaa 60 vel zo tawh; Sairang-a Rel luh hmain Kudam peih tul ti

Mizoram Rajya Sabha MP K. Vanlalvena'n Sairang-a FCI Kudam, buhfai Metric tonne 10000 chhekkhawl theihna tur sak mek chu 60% vel zawh a nih tawh thu leh hmabak la awm pawh khaihlak loa chhunzawm thuai a ni dawn tih a sawi.

Food Corporation of India (FCI) ten State Consultative Committee Meeting of Mizoram vawi 15-na nimin a Aizawl-a an neih zawhah Mizoram Rajya Sabha MP leh an Chairperson K. Vanlalvena chuan thuthar thehdarhtute kawmin, Sairang-a FCI Kudam sak mek za a 60 thawh zawh tawh chu Forest Department lamin Riverine Forest Reserve chhunga a awm an tih avanga a sak lai an chawlhtir avangin peih vat theih a nih loh thu leh hemi chungchangah hian indawrna a kal mek thu a sawi a, Mizoram sawrkar nen pawh hmalak a nih thu sawiin, Sairang-a Rel a lo luh-a buhfai phur Wagon a rawn luh theih hma ngeia Sihhmui a FCI kudam sak lai mek chu peih ngei a pawimawh thu a sawi bawk.

Rajya Sabha MP K. Vanlalvena chuan CSS Scheme hnuaiah cheng vbc. 17.50 sengin Khawzawl-ah FCI Kudam sak belh a nih tur thu sawiin, hei bakah hian MINECO lama Aizawl Divisional Office building sakna tur kum 2022-a an lo dil tawh bawhzuiin, FCI hotute chuan Chief Minister Lalduhoma chu May 19, 2024 khan hmuin, DO Aizawl atangin Chief Minister hnenah lehkha pawh an thawn tawh tih a sawi bawk.

Furpui thlen tak tak hmaa Mizoram buhfai tla tur chhekkhawl turin FCI chuan nasa takin tan an lak thu pawh Rajya Sabha MP chuan sawi bawkin, mipuiin an rinpui ber buhfai ngah tawk a tul thu leh leimin, tuilian leh harsatna dang ten buhfai chhekkhawl tibuai lo turin tan lak a ni tih a sawi a. Bairabi Rel thlen chin atanga FCI Kudam panna kawngpui meter 300 vela hla chu a kawng a chhiat deuh avangin buhfai thiar a chak theih loh thu a sawi bawk.

Mizoram FCI Consultative Committee Chairman K. Vanlalvena chuan kum 2024 June thla atanga August thla theng daih tur Mizoram FCI Kudam atanga Mizoram hmun hrang hranga ration buhfai semchhuah tur metric ton 15,260 vel phurhchhuah a nih tawh thu pawh sawiin, Mizoram-a FCI kaltlanga buhfai phurh luh chu Quintal 1,75,590 a nih thu a sawi a, Khawzawl-a FCI kudam sak mek Mizoram Sawrkarin a hmun kum 22 chhung chauh a pek pawh kum 99 a pawhsei a nih tawh thu a sawi bawk.

Thuneitute tarlan danin, June ni 11, 2024 thleng khan Mizoram FCI kudam paruk-ah buhfai Metric ton 16614 vel awm mekin, Kudam 2-ah Wheat metric ton 945 vel a awm mek bawk a ni.